انتخابی کمیشن نے 6 ریاستوں کی 7 اسمبلی سیٹوں پر ضمنی انتخاب کا کیا اعلان، 3 نومبر کو ووٹنگ، 6 نومبر کو ووٹ شماری

انتخابی کمیشن نے پیر کے روز چھ ریاستوں کی 7 خالی اسمبلی سیٹوں پر نومبر میں ضمنی انتخاب کرانے کا اعلان کر دیا ہے، کمیشن نے کہا کہ ووٹنگ 3 نومبر کو ہوگی اور 6 نومبر کو ووٹ شماری کی جائے گی۔ ضمنی انتخاب مہاراشٹر کے اندھیری ایسٹ، بہار کے مکامہ اور گوپال گنج، ہریانہ کے آدم پور، تلنگانہ کے منوگوڈے، اتر پردیش کے گولا گوکرناتھ اور اڈیشہ کے دھام نگر میں ہوں گے۔

ضمنی انتخاب کے لیے نوٹیفکیشن جمعہ کو جاری کیا جائے گا اور نامزدگی کا پرچہ داخل کرنے کی آخری تاریخ 14 اکتوبر ہوگی۔ نامزدگی کی جانچ کی تاریخ اور امیدواری واپس لینے کی آخری تاریخ بالترتیب 15 اکتوبر اور 17 اکتوبر ہوگی۔ ضمنی انتخاب کے لیے یکم جنوری 2022 کی ووٹر لسٹ کا استعمال کیا جائے گا۔

الیکشن کمیشن کا کہنا ہے کہ مناسب تعداد میں ای وی ایم اور وی وی پیٹ مشینیں دستیاب کرا دی گئی ہیں اور ان مشینوں کی مدد سے انتخاب بہتر انداز میں کرائے جانے کے لیے سبھی اقدام اٹھائے گئے ہیں۔