بی ایل او کی تنخواہ دوگنی، دیگر ملازمین کا معاوضہ بھی بڑھا

الیکشن کمیشن نے ہفتہ کے روز اعلان کیا کہ بوتھ لیول افسران (بی ایل اوز) کی تنخواہ کو دوگنا کیا جا رہا ہے، جبکہ الیکٹورل رجسٹریشن افسران (ای آر اوز) اور اسسٹنٹ الیکٹورل رجسٹریشن افسران (اے ای آر اوز) کو بھی اب اعزازیہ دیا جائے گا۔

بی ایل او کا معاوضہ 6,000 روپے سے بڑھا کر 12,000 روپے کر دیا گیا ہے۔ ووٹر لسٹ پر نظر ثانی کے لیے بی ایل او کو ملنے والا ترغیبی معاوضہ بھی 1,000 روپے سے بڑھا کر 2,000 روپے کر دیا گیا ہے۔ای آر او کو پہلی بار 30,000 روپے اعزازیہ دیا جائے گا، جبکہ اے ای آر او کو بھی پہلی بار 25,000 روپے اعزازیہ فراہم کیا جائے گا۔ بی ایل او نگراں کار کے معاوضے میں بھی اضافہ کیا گیا ہے۔بہار میں ایس آئی آر پائلٹ میں شامل بی ایل اوز کے لیے پہلے سے منظور شدہ 6,000 روپے کا خصوصی ترغیبی معاوضہ حسبِ سابق جاری رہے گا۔

یہ اضافہ ان افسران کے ’’اہم کردار‘‘ کو مدِنظر رکھتے ہوئے کیا گیا ہے، جو وہ منصفانہ اور شفاف ووٹر فہرستیں تیار کرنے میں ادا کرتے ہیں۔ انتخابی کمیشن نے ایک پریس نوٹ میں اس بات کی اطلاع دی۔کمیشن کے بیان میں کہا گیا ہے کہ اس فیصلے کا مقصد انتخابی عملے کا حوصلہ بلند کرنا اور انہیں درست اور شفاف ووٹر لسٹیں تیار کرنے کی ترغیب دینا ہے۔