لکھیم پور تشدد معاملہ میں کار ڈرائیور شیکھر بھارتی گرفتار

کسان قتل واقعہ کے ایک دیگر مطلوب ملزم شیکھر بھارتی کو کھیری پولیس کی کرائم برانچ نے لکھنؤ کے اے پی سین روڈ سے گرفتار کیا ہے۔

علامتی فائل تصویر آئی اے این ایس
علامتی فائل تصویر آئی اے این ایس
user

قومی آوازبیورو

اترپردیش کے ضلع لکھیم پور کھیری کے تکونیا میں چار کسانوں سمیت آٹھ افراد کے مارے جانے کے واقعہ میں مطلوب ایک دیگر ملزم کو پولیس نے منگل کو گرفتار کرلیا۔

پولیس ذرائع نے بتایا کہ کسان قتل واقعہ کے ایک دیگر مطلوب ملزم شیکھر بھارتی کو کھیری پولیس کی کرائم برانچ نے لکھنؤ کے اے پی سین روڈ سے گرفتار کیا ہے۔انہوں نے بتایا کہ شیکھر بھارتی کو سی جے ایم عدالت میں پیش کر کے 14دنوں کی پولیس ریمانڈ مانگی گئی لیکن عدالت نے ملزم کو عدالتی تحویل میں لیتے ہوئے سماعت کے لئے بدھ کا دن طے کیا ہے۔


ذرائع نے بتایا کہ شیکھر بھارتی لکھیم پور واقعہ کے کلیدی ملزم آشیش مشر کے دوست انکت داس کی کار کا ڈرائیور ہے۔ واضح رہے اس معاملہ میں مرکزی وزیر مملکت اجے مشرا ٹینی کا بیٹا آشیش مشرا پہلے ہی پولیس حراست میں ہے۔ آشیش مشر ا کو پولیس نے پوچھ تاچھ کے لئے بلایا تھا اور جب وہ پولیس کے سوالوں کے جواب اطمینان بخش نہیں دے پایا تو پولیس نے اس کو حراست میں لے لیا تھا۔

احتاج کر رہے کسانوں اور مرنے والے کسانوں کے اہل خانہ کا الزام ہے کہ جس گاڑی نے چار کسانوں کو روندا ہے اس میں آ شیش مشرا موجود تھا جبکہ آشیش اور اس کے والد اس الزام کی تردید کر رہے ہیں لیکن آشیش پولیس کو یہ اطمینان دلانے میں ناکام رہا کہ وہ تشدد کے وقت واردات کی جگہ موجود نہیں تھا۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔