ڈاکٹر نریش کمار نے رام منوہر لوہیا اسپتال میں زیر علاج سابق گورنر ستیہ پال ملک سے کی ملاقات

جموں و کشمیر کے سابق گورنر ستیہ پال ملک اس وقت سخت علیل ہیں۔ ان کا علاج دہلی کے رام منوہر لوہیا اسپتال میں چل رہا ہے۔ 17 جون کو دہلی کانگریس کمیٹی کے سینئر ترجمان ڈاکٹر نریش کمار نے ان سے اسپتال میں ملاقات کی اور صحت کے بارے میں جانکاری لی۔ انھوں نے ستیہ پال ملک کی جلد صحت یابی کی دعا کرنے کے ساتھ ساتھ کانگریس کی طرف سے نیک خواہشات بھی پیش کیں۔

اس ملاقات سے متعلق ڈاکٹر نریش کمار کے میڈیا ڈپارٹمنٹ نے جانکاری دی۔ جاری بیان کے مطابق ڈاکٹر نریش کمار نے ستیہ پال ملک سے ملاقات کے بعد کہا کہ وہ ہندوستانی سیاست میں ایک بے باک اور سچے عوامی نمائندہ کی شکل میں پہچانے جاتے ہیں۔ بزرگ لیڈران کی عزت کرنا اور حال چال پوچھنا ہماری سیاسی ثقافت کا حصہ ہے۔

جب ڈاکٹر نریش کمار نے رام منوہر لوہیا اسپتال میں ستیہ پال ملک سے ملاقات کی، تو ان کے ساتھ کانگریس کے سینئر لیڈر اور سابق رکن قانون ساز کونسل ہریندر اگروال اور ٹھاکر گیانیند پرتاپ سنگھ بھی موجود تھے۔ سبھی لیڈران نے ستیہ پال ملک کی خرابیٔ صحت کو لے کر فکر کا اظہار کیا اور ڈاکٹروں سے ان کے بہتر علاج کی درخواست کی۔ یہ ملاقات انتہائی خیر سگالی والے ماحول میں ہوئی۔