غیر مجاز کالونیوں کو بلا معاوضہ باقاعدہ کیا جائے، موجودہ اسکیم ناکام: ڈاکٹر نریش کمار

نئی دہلی: دہلی کانگریس کے سینئر ترجمان ڈاکٹر نریش کمار نے دہلی کے لیفٹیننٹ گورنر ترنجیت سنگھ سندھو کو ایک میمورنڈم پیش کرتے ہوئے مطالبہ کیا ہے کہ قومی راجدھانی کی تمام 1511 غیر مجاز کالونیوں کو کسی بھی قسم کی فیس وصول کیے بغیر باقاعدہ کیا جائے۔ انہوں نے کہا کہ پردھان منتری اَن آتھورائزڈ کالونیز اِن دہلی آواس یوجنا (پی ایم-اُدے) اسکیم ایک مرتبہ پھر اپنے مقصد کے حصول میں ناکام ثابت ہوئی ہے۔

ڈاکٹر نریش کمار نے کہا کہ ذرائع ابلاغ کی اطلاعات کے مطابق اپریل 2026 میں اسکیم دوبارہ شروع کیے جانے کے بعد اب تک صرف 10 سے 20 درخواستیں موصول ہوئی ہیں۔ ان کے مطابق اسی صورت حال کے پیش نظر میونسپل کارپوریشن نے دہلی ترقیاتی اتھارٹی کو اسکیم کے تحت مقررہ فیس میں کمی کرنے کی سفارش کی ہے۔

انہوں نے کہا کہ حکومت یہ تاثر دے رہی ہے کہ وہ لوگوں کو ملکیت کے حقوق فراہم کر رہی ہے، جبکہ ان غیر مجاز کالونیوں میں رہنے والے بیشتر افراد پہلے ہی اپنے پلاٹوں کے قانونی خریدار ہیں۔ ان کے بقول اصل مسئلہ ملکیت کے ثبوت کا نہیں بلکہ کالونیوں کو باقاعدہ بنانے اور وہاں رہنے والے شہریوں کو سڑک، پانی، نکاسیٔ آب، بجلی اور دیگر بنیادی شہری سہولیات فراہم کرنے کا ہے۔ انہوں نے کہا کہ موجودہ اسکیم عوام کے لیے مہنگی اور پیچیدہ کاغذی کارروائی کا باعث بن گئی ہے۔

ڈاکٹر نریش کمار نے اطلاعات کے حق کے قانون کے تحت حاصل کی گئی معلومات کا حوالہ دیتے ہوئے کہا کہ 16 فروری 1977 کو اُس وقت کی کانگریس حکومت نے "جیسی ہے، جہاں ہے" کی بنیاد پر غیر مجاز کالونیوں کو بلا معاوضہ باقاعدہ بنانے کی پالیسی اختیار کی تھی۔ انہوں نے کہا کہ اس فیصلے کے تحت پانچ سو سڑسٹھ غیر مجاز کالونیوں کو باقاعدہ بنانے کا عمل شروع کیا گیا اور اکتوبر 1993 تک ان تمام کالونیوں کو باقاعدہ کر دیا گیا۔

انہوں نے لیفٹیننٹ گورنر سے مطالبہ کیا کہ اسی پالیسی کو دوبارہ نافذ کرتے ہوئے دہلی کی تمام 1511 غیر مجاز کالونیوں کو بغیر کسی مالی بوجھ کے باقاعدہ کیا جائے۔ ان کے مطابق اس فیصلے سے لاکھوں شہریوں کو قانونی تحفظ ملے گا اور انہیں مجاز کالونیوں کی طرح بنیادی شہری سہولیات بھی دستیاب ہو سکیں گی۔

ڈاکٹر نریش کمار نے کہا کہ غیر مجاز کالونیوں کے رہائشی کئی دہائیوں سے مستقل حل کے منتظر ہیں، اس لیے حکومت کو چاہیے کہ وہ مہنگی اور پیچیدہ اسکیموں کے بجائے عوامی مفاد کو ترجیح دیتے ہوئے ان کالونیوں کو بلا معاوضہ باقاعدہ بنانے کا فیصلہ کرے تاکہ دہلی کے لاکھوں شہریوں کو اس دیرینہ مسئلے سے مستقل نجات مل سکے۔