گھر سے مت نکلیے، ہم آپ کو کورونا سے بھی بچائیں گے اور بھوک بھی مٹائیں گے: کیجریوال

دہلی کے وزیر اعلیٰ اروند کیجریوال نے لوگوں سے اپیل کی ہے کہ آپ کسی بھی طرح کی جلد بازی کا مظاہرہ نہ کریں کیونکہ خوردنی اشیاء یا کسی بھی ضروری سامان کی قلت نہیں ہونے دی جائے گی۔

tتصویر سوشل میڈیا
tتصویر سوشل میڈیا
user

قومی آوازبیورو

ہندوستان میں 21 دنوں کے لیے لاک ڈاؤن کا اعلان ہوتے ہی لوگوں میں جیسے ایک افرا تفری کا عالم پیدا ہو گیا اور 24 مارچ کو رات سے ہی لوگ گھروں سے نکل کر بڑی تعداد میں دکانوں پر پہنچنے لگے تاکہ ضروری سامان خرید کر گھر میں رکھ سکیں۔ پی ایم مودی نے اچانک لاک ڈاؤن کر کے لوگوں کو گھروں میں رہنے کی جو ہدایت دی تھی، اس کا ٹھیک الٹا نظر آنے لگا۔ دہلی میں بھی حالات دگرگوں ہی نظر آئے کیونکہ کئی علاقوں میں کرانہ، سبزی اور پھلوں کی دکانوں میں لوگوں کی زبردست بھیڑ دیکھنے کو ملی۔ حالات کو مدنظر رکھتے ہوئے آج دہلی کے وزیر اعلیٰ اروند کیجریوال نے لیفٹیننٹ گورنر انل بیجل کے ساتھ پریس کانفرنس کر عوام کو اس بات کی یقین دہانی کرائی کہ وہ جلد بازی کا مظاہرہ نہ کریں کیونکہ خوردنی اشیاء یا کسی بھی ضروری سامان کی قلت نہیں ہونے دی جائے گی۔

اروند کیجریوال نے پریس کانفرنس میں لوگوں سے صبر کرنے کی اپیل کرتے ہوئے کہا کہ ڈرنے کی کوئی ضرورت نہیں ہے، وقت وقت پر ضروری سامان ملتا رہے گا اور اس کے لیے حکومت نے پوری تیاری کی ہوئی ہے۔ وزیر اعلیٰ نے واضح لفظوں میں کہا کہ "دہلی پولس، دہلی حکومت اور پوری انتظامیہ، ہم سب مل کر آپ کے لیے کام کر رہے ہیں۔ ہمیں آپ کے تعاون کی بہت ضرورت ہے۔" انھوں نے مزید کہا کہ "ہم عوام سے اپیل کرتے ہیں کہ انھیں ڈرنے کی کوئی ضرورت نہیں ہے۔ ضرورت پڑی تو حکومت گھر گھر میں سبھی کو ضروری سامان پہنچائے گی۔"

پی ایم مودی کے ذریعہ پورے ملک میں لاک ڈاؤن کا اعلان کیے جانے کے بعد دکانوں میں لگی بھیڑ کا تذکرہ کرتے ہوئے اروند کیجریوال نے کہا کہ "پی ایم مودی کے خطاب کے بعد دکانوں پر لائنیں لگنے لگیں۔ اگر ایسا ہوا تو لاک ڈاؤن سے کوئی فائدہ نہیں ملے گا۔ میں سب کو یقین دلانا چاہتا ہوں کہ ہم نے ساری تیاری کر رکھی ہے۔ دودھ، سبزی، کرانہ وغیرہ سبھی چیزوں کا دھیان رکھا جائے گا۔ آپ کو یہ سبھی سہولیات ملتی رہیں گی۔ ہم آپ کو کسی چیز کی قلت نہیں ہونے دیں گے۔"

وزیر اعلیٰ کیجریوال نے ضروری سامان فروخت کرنے والے سبھی دکانداروں کو کرفیو پاس مہیا کرائے جانے کا بھی تذکرہ پریس کانفرنس میں کیا۔ انھوں نے کہا کہ "ضروری سامان والے سبھی دکانداروں کو پاس دینے کا منصوبہ دہلی حکومت بنا رہی ہے۔ ہم اس کے لیے شام تک ہیلپ لائن نمبر بھی جاری کریں گے۔ ہم ای-پاس جاری کریں گے۔ حکومت ایمرجنسی خدمات والوں کو بھی پاس دے گی۔" انھوں نے مزید کہا کہ "گھر سے باہر مت نکلیں۔ ہم پوری طرح سے کوشش کر رہے ہیں کہ کورونا وائرس سے آپ کو بچائیں اور کوئی بھوکا بھی نہ سوئے۔"