ڈونلڈ ٹرمپ کی ٹوئٹر پر واپسی، ایلون مسک نے بتایا اکاؤنٹ کیوں بحال کیا گیا

امریکہ کے سابق صدر ڈونلڈ ٹرمپ ایک مرتبہ پھر ٹوئٹر پر نظر آئیں گے۔ ٹوئٹر کے نئے مالک ایلون مسک نے ٹرمپ کے اکاؤنٹ کو بحال کر دیا ہے

ڈونالڈ ٹرمپ، تصویر یو این آئی
ڈونالڈ ٹرمپ، تصویر یو این آئی
user

قومی آوازبیورو

واشنگٹن: امریکہ سابق صدر ڈونلڈ ٹرمپ کی ٹوئٹر پر پھر سے واپسی ہو گئی ہے۔ ٹوئٹر کے نئے مالک ایلون مسک نے ٹوئٹ کے ذریعے اس کا اعلان کیا۔ مسک نے ایک روز قبل ہی ٹوئٹر صارفین سے پوچھا تھا کہ آیا ڈونلڈ ٹرمپ کے اکاؤنٹ کو بحال کیا جانا چاہئے؟ ان کے سوال کا جواب دینے والوں میں سے 52 فیصد نے کہا تھا کہ اکاؤنٹ بحال کر دینا چاہئے، جبکہ 48 فیصد اس کے خلاف تھے۔

ایلون مسک نے ڈونلڈ ٹرمپ کا اکاؤنٹ بحال کرنے سے متعلق آگاہ کیا۔ انہوں نے ٹویٹر پر لکھا، "عوام نے اپنا جواب دے دیا ہے، ٹرمپ کا اکاؤنٹ بحال کر دیا جائے گا"۔ خیال رہے کہ 6 جنوری 2021 کو یو ایس کیپٹل میں ہنگامہ ہوئے اور ڈونلڈ ٹرمپ کو کسی حد تک اس کا ذمہ دار ٹھہرایا گیا۔


فسادات میں ان کے کردار کے حوالے سے بھی تحقیقات جاری ہیں۔ وہ زیادہ تر ٹوئٹر کے ذریعے اپنے حامیوں سے بات کرتے تھے، یہی وجہ تھی کہ ہنگامہ آرائی کے فوراً بعد ان پر سوشل نیٹ ورکنگ پلیٹ فارم سے پابندی لگا دی گئی۔ اس کے بعد سے سابق امریکی صدر اپنی سماجی رابطے کی ایپ ٹرتھ سوشل پر سرگرم ہیں۔

قابل ذکر بات یہ ہے کہ ٹوئٹر کے نئے مالک ایلون مسک شروع سے ہی آزادانہ اظہار رائے کے حوالے سے کافی آواز اٹھا رہے ہیں۔ ٹوئٹر خریدنے سے پہلے ہی انہوں نے اس پر پالیسی واضح کر دی تھی۔ ان کا ماننا ہے کہ ہر کسی کو بغیر کسی خوف کے ٹوئٹر پر بات کرنے کا حق ہونا چاہیے۔ اسی سلسلہ میں انہوں نے عوام سے ٹرمپ کے اکاؤنٹ کو بحال کرنے سے متعلق سوال پوچھا۔


ایلون مسک نے ٹوئٹر میں آتے ہی بہت کچھ بدل دیا ہے۔ گزشتہ ماہ انہوں نے یہ کمپنی 44 بلین امریکی ڈالر میں حاصل کی اور ایک ایک کر کے ایسے فیصلے کیے جس نے سب کو حیران کر دیا۔ چاہے وہ کمپنی کی اعلیٰ انتظامیہ کو کمپنی سے ہٹانا ہو یا ٹوئٹر میں بڑے پیمانے پر برطرفی ہو۔ انہوں نے سوشل میڈیا پلیٹ فارم میں بہت سی تبدیلیاں کیں اور آنے والے وقت میں بہت سی تبدیلیاں دیکھی جا سکتی ہیں۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔