کرکٹر ہربھجن سنگھ کے متنازعہ ٹوئٹ پر ہنگامہ، لوگوں نے کہا ’شرم آنی چاہیے‘

چندریان-2 کی کامیاب لانچ کے بعد پورے ملک میں خوشی کا ماحول ہے اور اس کے بعد سوشل میڈیا پر مبارکباد کا ایک لمبا سلسلہ شروع ہو گیا ہے۔ ہندوسانی سائنسدانوں کی پوری دنیا میں زبردست تعریف ہو رہی ہے۔ اسی درمیان ہندوستان کے معروف کرکٹر ہر بھجن سنگھ نے چندریان کو لے کر ایسا ٹوئٹ کیا ہے جس سے لوگ بھڑک گئے ہیں اور ان کو ٹرول کر رہے ہیں۔ انہوں نے اپنے متنازعہ ٹوئٹ میں پاکستان سمیت کئی ممالک کے جھنڈے لگا کر لکھا ہے کہ کئی ممالک کے جھنڈوں میں چاند ہوتا ہے اور کئی ملکوں کے جھنڈے چاند پر ہوتے ہیں۔ جب انہوں نے یہ لکھا کہ کئی ممالک کے جھنڈے چاند پر ہوتے ہیں اس میں انہوں نے امریکہ، روس، چین اور ہندوستان کے جھنڈے لگائے۔

اپنے ٹوئٹ میں جہاں انہوں نے یہ لکھا ہے کہ کچھ ممالک کے جھنڈوں میں چاند ہوتا ہے اس میں انہوں نے مسلم ممالک جیسے پاکستان، ترکی، لیبیا، تیونشیا، ازربائیجان، ملائشیا، مالدیپ اور ماریٹینیا کے جھنڈے لگائے ہیں۔ اس پر بہت سے لوگوں نے لکھا کہ ’آپ کھلاڑی نہیں ہیں بلکہ ایک فرقہ پرست انسان ہیں کیونکہ آپ نے صرف ان ممالک کے جھنڈے اپنے ٹوئٹ میں لگائے ہیں جو مسلم ممالک ہیں جبکہ نیپال کے علاوہ کئی ایسے ممالک ہیں جیسے سنگاپور، لاؤس، منگولیا وغیرہ ممالک ہیں جن کے جھنڈوں میں چاند کی تصویر ہے لیکن ان کوجان بوجھ کر چھوڑ دیا گیا ہے‘۔

کھلاڑیوں کو بارے میں یہ تصور کیا جاتا ہے کہ وہ مذہب اور ذات پات سے اوپر اٹھ کر سوچتے ہیں لیکن ہر بھجن نے جس طرح کا ٹوئٹ کیا ہے اس میں فرقہ پرست ذہنیت کی بو آتی ہے۔