ڈمپل یادو مین پوری میں زبردست جیت کی طرف گامزن، شیو پال کی پارٹی کا سماجوادی پارٹی میں انضمام

لکھنؤ: اتر پردیش کی مین پوری لوک سبھا سیٹ کے لئے ووٹوں کی گنتی کے رجحانات میں سماجوادی پارٹی (ایس پی) کی امیدوار ڈمپل یادو بڑی برتری کے ساتھ جیت کی طرف گامزن ہیں۔ اس کے علاوہ کھتولی میں بھی آر ایل ڈی امیدوار آگے چل رہے ہیں، جنہیں سماجوادی پارٹی کی حمایت حاصل ہے۔ رامپور سیٹ پر بھی پارٹی حکمران جماعت بی جے پی کو کڑی ٹکر دی ہے۔

اسی دوران اکھلیش کے چچا شیو پال یادو ملائم سنگھ کی آخری آرام گاہ پر پہنچے اور کہا کہ ’جس کا جلوہ قائم ہے، اس کا نام ملائم ہے۔‘ اس کے بعد اکھلیش نے شیو پال یادو کو ایس پی کا جھنڈا فراہم کیا۔ خیال رہے کہ ایس پی لیڈر فی الحال سیفئی میں جمع ہیں۔ اس دوران اکھلیش یادو نے چچا شیو پال کے پیر چھو کر آشیرواد لیا۔ شیو پال کے بھتیجے اور ضلع پنچایت صدر ابھیشیک عرف انشول یادو نے اپنی گاڑی سے پرسپا (پرگتی شیل سماجوادی پارٹی) کا جھنڈا ہٹا کر اس پر ایس پی کا جھنڈا لگا دیا۔ فی الحال شیو پال یادو کی جانب سے انضمام کا باضابطہ اعلان ہونا باقی ہے۔

اس سے پہلے اٹاوہ ایس پی سربراہ اکھلیش یادو اور شیو پال یادو مین پوری میں زبردست سبقت کے بعد اٹاوہ پہنچے۔ سب سے پہلے اکھلیش یادو ملائم سنگھ کی سمادھی پر پہنچے۔ انہیں خراج عقیدت پیش کیا گیا۔ اس کے بعد وہ سیدھے چچا شیو پال یادو سے ملنے گئے۔ مین پوری میں ڈمپل یادو کی زبردست جیت میں شیو پال یادو کے حلقہ جسونت نگر کا سب سے بڑا ہاتھ رہا ہے۔ ڈمپل یادو کو یہاں سے ایک لاکھ سے زیادہ ووٹ ملے۔ ڈمپل نے یہاں سے جو برتری حاصل کی، وہ آخر تک برقرار رہی۔

الیکشن کمیشن سے موصولہ اطلاع کے مطابق مین پوری ضمنی انتخاب میں ایس پی امیدوار ڈمپل یادو نے ناقابل شکست برتری حاصل کر لی ہے۔ آخری اطلاع موصول ہونے تک ڈمپل یادو کو 593893 ووٹ حاصل ہو چکے تھے، جبکہ بی جے پی کے رگھوراج سنگھ شاکیہ کو 320323 ووٹ ہی ملے تھے۔ ڈمپل یادو کو بی جے پی امیدار سے 273570 ووٹ زیادہ حاصل ہو چکے تھے۔