بنگال میں آج دیدی بمقابلہ مودی! وزیر اعظم کی کولکاتا میں ریلی، ممتا بنرجی کا سلّی گڑی میں مارچ

کولکاتا: مغربی بنگال اسمبلی انتخابات کی تاریخوں کے اعلان کے بعد سیاسی گھمسان میں تیزی آ رہی ہے۔ وزیر اعلی ممتا بنرجی نے اپنی پارٹی ترنمول کانگریس (ٹی ایم سی) کے 291 امیدواروں کے ناموں کا اعلان کر دیا ہے، جبکہ حزب اختلاف بھارتیہ جنتا پارٹی (بی جے پی) نے بھی 57 نشستوں کے لئے فہرست جاری کر دی ہے۔

امیدواروں کے اعلان کے بعد اہم لیڈران انتخابی تشہیر میں کود پڑے ہیں۔ وزیر اعظم نریندر مودی آج یعنی 7 مارچ کو کولکاتا میں بی جے پی کے انتخابی جلسہ سے خطاب کریں گے۔ طے شدہ پروگرام کے مطابق پی ایم مودی دن کے 2 بجے بریگیڈ پریڈ گراؤنڈ میں منعقدہ جلسہ عام سے خطاب کریں گے۔ جس وقت وزیر اعظم نریندر مودی جنوبی بنگال میں جلسے کر رہے ہوں گے، اسی وقت سی ایم ممتا بنرجی شمالی بنگال کے سلیگڑی میں پدیاترا (پیدل مارچ) نکال کر اپنی طاقت کا احساس کرائیں گی۔

میڈیا رپورٹ کے مطابق بی جے پی نے وزیر اعظم کی ریلی کو کامیاب بنانے کے لئے پوری طاقت جھونک دی ہے۔ بی جے پی لیڈران کا دعویٰ ہے کہ اس جلسہ عام میں لاکھوں لوگوں شرکت کریں گے۔ بی جے پی کے بنگال انچارج کیلاش وجے ورگیہ اس وقت کولکاتا میں موجود ہیں، اس کے علاوہ مرکزی وزیر گجندر سنگھ شیکھاوت سمیت کئی دیگر متعدد لیڈران بھی کولکاتا پہنچ چکے ہیں۔ بی جے پی نے وزیر اعظم کی ریلی کے لئے 'بریگیڈ چلو' کا نعرہ دیا ہے۔

ذرائع کا کہنا ہے کہ سینما کے اسٹار متھن چکرورتی بھی وزیر اعظم مودی کی ریلی میں شریک ہوں گے۔ دراصل گزشتہ روز کیلاش وجے ورگیہ نے کولکاتا کے بیل گچھیا میں متھن چکرورتی سے ملاقات کی تھی۔ کیلاش وجے ورگیہ نے دیر رات ٹویٹ کر کے اس کی اطلاع دی اور کہا ’متھن دا کے ساتھ ان کی طویل بات چیت ہوئی۔ ان کی حب الوطنی اور غریبوں کے تئی محبت کی کہانیاں سن کر دل باغ باغ ہو گیا۔‘‘

وزیر اعلی ممتا بنرجی اور ان کی پارٹی ترنمول کانگریس وزیر اعظم مودی اور بی جے پی کو واک اوور دینے کے موڈ میں نہیں ہیں اور وزیر اعظم مودی کی کولکاتا ریلی کے وقت وہ سلیگڑی میں ریلی نکال کر اپنی طاقت کا مظاہرہ کریں گی۔ گھریلو گیس کی بڑھتی قیمتوں کے خلاف منعقدہ اس ریلی میں خواتین حصہ لیں گی۔