رام مندر کے لیے رام بھکتوں کو کرنا ہوگا 3 سال کا انتظار!

شری رام جنم بھومی تیرتھ چھیتر ٹرسٹ کی تشکیل کے 15 دنوں بعد ایودھیا لوٹے اس کے سربراہ مہنت نرتیہ گوپال داس نے کہا کہ رام مندر کا جو ماڈل تیار کیا گیا ہے اس کو زمین پر اتارنے میں 2 سے 3 سال لگ جائیں گے۔

تصویر سوشل میڈیا
تصویر سوشل میڈیا
user

قومی آوازبیورو

ایودھیا میں شری رام جنم بھومی تیرتھ چھیتر ٹرسٹ کے سربراہ مہنت نرتیہ گوپال داس نے کہا کہ ابھی رام بھکتوں کو رام مندر کے لیے کچھ انتظار کرنا ہوگا کیونکہ رام مندر کے ممکنہ احاطہ کو مندر تعمیر کے لائق بنانے میں ہی ابھی چھ ماہ لگ جائیں گے۔ منگل کے روز نرتیہ گوپال داس نے کہا کہ ’’بھکت دو تین سالوں بعد شری رام کے عظیم الشان مندر کے درشن کر سکیں گے۔‘‘ انھوں نے مزید کہا کہ ’’شری رام جنمو بھومی پر مندر تعمیر سے پہلے قبضے میں لیے گئے احاطہ کو عقیدتمندوں کے لیے صاف اور پاک بنایا جائے گا، جس کا عمل شروع ہو گیا ہے۔‘‘

دہلی میں ٹرسٹ تشکیل کے 15 دنوں بعد ایودھیا لوٹے مہنت نرتہی گوپال داس نے کہا کہ سماج کا فلاح وہی کر سکتا ہے جس کی شخصیت عام لوگوں سے جڑی ہو۔ انھوں نے کہا کہ ’’مندر تعمیر سے پہلے رام للا کو غیر مستقل طور پر احاطہ میں ہی ویدک دانشوروں کی دیکھ ریکھ میں منتقل کیا جائے گا، تاکہ بھکتوں کو بھگوان کا دَرشن لگاتار ہوتا رہے۔‘‘


ایک سوال کے جواب میں انھوں نے کہا کہ ’’ملک کے وزیر اعظم نریندر مودی کو میں نے ایودھیا آنے کے لیے مدعو کیا ہے۔ یہی نہیں سابق وزیر اعلیٰ کلیان سنگھ جی کو بھی پیغام بھیجا ہے۔ شری رام جنم بھومی تیرتھ چھیتر ٹرسٹ کی میٹنگ جلد ہوگی، ابھی کام کی رفتار کو بڑھایا جا رہا ہے۔‘‘ اس دوران دوسرے سوال کے جواب میں انھوں نے کہا کہ ’’ایودھیا کو بھی کاشی کی طرح ترقی دی جانی چاہیے۔ یہ دنیا کی مذہبی ثقافتی راجدھانی ہے۔ اس کی شکل بھی دنیا کے لوگوں کو متوجہ کرنے والی ہونی چاہیے۔‘‘

رام مندر تعمیر کے بارے میں بات کرتے ہوئے نرتیہ گوپال داس نے کہا کہ پتھروں پر نقاشی کا کام کافی آگے بڑھ چکا ہے اور بقیہ بچے پتھروں کی نقاشی کا کام بھی جلد شروع ہوگا اور ٹرسٹ کی اگلی میٹنگ تک اس سلسلے میں فیصلہ لیا جائے گا۔ انھوں نے مزید کہا کہ ’’قبل میں شری رام جنم بھومی نیاس نے رام مندر کے جس ماڈل کو تیار کرایا اور جسے ملک کے سنتوں نے وید منتروچارن کر مقبول بنایا اور جس کی تصویر کروڑوں گھروں میں پوجا کے لیے رکھی گئی ہے، وہ عظیم الشان مندر دو سے تین سالوں میں سب کے سامنے آنے والا ہے۔‘‘

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔