’تاوان دینے کے باوجود نہ تو پولیس بدمعاشوں کو پکڑ سکی اور نہ ہی اغوا شخص کو آزاد کرا پائی‘

نئی دہلی: کانگریس کی جنرل سکریٹری اور اتر پردیش کی انچارج پرینکا گاندھی نے کانپور میں ایک نوجوان کے اغوا کے معاملے پر یوگی حکومت کو نشانہ بناتے ہوئے کہا کہ اس واقعہ سے آسانی سے ریاست میں نظام قانون کی صورتحال کا اندازہ لگایا جا سکتا ہے۔

پرینکا گاندھی بدھ کے روز کہا ’’کانپور میں بدمعاشوں نے ایک نوجوان کا اغوا کر لیا تھا۔ متاثرہ کنبے سے اغواکاروں نے تاوان دینے کو کہا۔ کنبہ نے تاوان کی رقم دینے کے لئے مکان اور شادی کے زیورات فروخت کر کے 30 لاکھ جمع کیے۔ پولیس کے کہنے پر گھر والوں نے پیسوں سے بھرا بیگ بھی اغوا کرنے والوں کے حوالہ کر دیا پھر بھی پولیس نہ تو بدمعاشوں کو پکڑ سکی اور نہ ہی ان کے بیٹے کو رہا کرا سکی۔ اب گھر والے کافی دکھی ہیں اور ان کا برا حال ہے۔

گزشتہ دنوں گینگسٹر وکاس دوبے کے ذریعہ آٹھ پولیس اہلکاروں کے قتل کا ذکر کرتے ہوئے انہوں نے کہا کہ ’ یہ اسی کانپور کا معاملہ ہے جہاں کچھ روز قبل اتنا بڑا واقعہ پیش آیا تھا۔ آپ یو پی میں امن و قانون کی صورتحال کا اندازہ اسی واقعہ سے لگا سکتے ہیں‘‘۔

کیا ہے پورا معاملہ؟

کانپور کی برّا تھانہ پولیس کو چکمہ دے کر شاطر اغوا کاروں نے تاوان کے 30 لاکھ روپے کنبہ سے وصول کیے اور اغوا شخص کو بھی نہیں چھوڑا گیا۔ 22 جون سے اغوا لیگ ٹیکنیشین سنجیت یادو کو چھوڑنے کی عوض گجینی فلائی اوور کے اوپر بلایا۔

مکان اور زیروات کو فروخت کر کے جمع کی گئی رقم لے کر متاثرہ اہل خانہ فلائی اوور پر پہنچے تو پولیس بھی ان کے پیچھے پیچھے اغواکاروں کو گرفتار کرنے کے لئے پہنچ گئی۔ اغواکار پولیس کے منصوبہ کو بھانپ گئے اور فلائی اوور کے نیچے کھڑے ہو گئے۔ اس کے بعد انہوں نے فون کر کے اہل خانہ سے رقم کا بیگ فلائی اوور سے نیچے پھینکنے کو کہا۔ اس سے پہلے کہ پولیس ان تک پہنچتی، وہ فرار ہو گئے۔ اہل خانہ نے ایس ایس پی کے ہاں گہار لگائی ہے۔