اے پی کی خاتون وزیر داخلہ و نائب وزیر اعلی ایم سُچترا نے ذمہ داری سنبھال لی

حیدرآباد: اے پی کی خاتون وزیر داخلہ و نائب وزیراعلی ایم سُچترا نے آج صبح اپنی ذمہ داری سنبھال لی۔ سکریٹریٹ کے دوسرے بلاک میں واقع اپنے چیمبر میں پوجا کے بعد انہوں نے ذمہ داری سنبھالی۔

اس موقع پر انہوں نے کہا کہ ریاست میں لا اینڈ آرڈر کی برقراری کے اقدامات کیے جائیں گے۔ لا اینڈ آرڈر کی برقراری کی ذمہ داری ہر ایک کی ہے۔ انہوں نے کہا کہ پولس ملازمین کی فلاح وبہبود کے لئے حکومت پابند عہد ہے۔ پولس ملازمین کو ہفتہ واری تعطیل دینے کا بھی وزیر اعلی نے حال ہی میں اعلان کیا ہے۔ اس سلسلہ میں ایک کمیٹی تشکیل دی جائے گی اور اس کمیٹی کی رپورٹ کی سفارشات پر عمل کیا جائے گا۔

پولس کے محکمہ میں مخلوعہ عہدوں کو جلد ہی پُر کیا جائے گا۔ انہوں نے نشاندہی کی کہ خواتین کو ہراساں کرنے والوں کے خلاف سخت کارروائی کی جائے گی۔ انہوں نے نئی ذمہ داری دینے پر وزیراعلی جگن موہن ریڈی سے اظہار تشکر کیا اور کہا کہ وزیراعلی نے ایک دلت خاتون کو وزیر داخلہ بنایا ہے۔ انہوں نے جرائم کی وارداتوں میں ملوث افراد کے خلاف بھی سخت کارروائی کا انتباہ دیا۔

سچترا نے کہا کہ ریگنگ، خواتین کو ہراساں کرنے کی وارداتوں پر خواتین اور لڑکیاں بلا خوف وخطر پولس سے شکایت کر سکتی ہیں۔ خواتین کی سلامتی کے لئے خصوصی ٹول فری نمبر قائم کیا جائے گا۔ انہوں نے کہا کہ مرکزی حکومت نے ریاست کے لئے پولس کی چار بٹالین منظور کی گئی ہیں۔ جلد ہی محکمہ پولس میں خواتین کی بٹالین، گریجن بٹالین کا بھی قیام عمل میں لایا جائے گا۔ انہوں نے کہا کہ خاتون پولس کانسٹیبلز کی بہبود کو اولین ترجیح دی جائے گی۔