دہلی کی فضائی آلودگی میں آ رہی ہے کمی، اے کیو آئی 200 سے نیچے پہنچنے پر لوگوں نے لی راحت کی سانس

دسمبر مہینہ میں دہلی-این سی آر باشندوں کو فضائی آلودگی سے کافی راحت ملتی ہوئی دکھائی دے رہی ہے۔ مسلسل چوتھے دن بدھ کو راجدھانی کی ہوا کے معیار میں بہتری آئی ہے۔ مرکزی آلودگی کنٹرول بورڈ (سی پی سی بی) کے مطابق انڈیا گیٹ علاقے میں صبح 7 بجے کے قریب ایئر کوالیٹی انڈیکس (اے کیو آئی) 169 ریکارڈ کیا گیا جسے درمیانی زمرے میں رکھا گیا گیا ہے۔ یہاں کا درجہ حرارت 13٫05 ڈگری سیلسیس درج ہوا۔

دہلی کے علاقوں میں ہوا کے معیار کی بات کی جائے تو یہاں آنند وِہار میں اے کیو آئی 250، علی پور میں 198، آیا نگر میں 164، چاندنی چوک میں 187، دوارکا سیکٹر-8 میں 248، آئی ٹی او میں 169، جہانگیر پوری میں 259 درج کیا گیا۔ وہیں غازی آباد کے اندرا پورم میں اے کیو آئی 125، وسندھرا میں 114 اور نوئیڈا سیکٹر-62 میں 158 ریکارڈ کیا گیا۔

واضح ہو کہ منگل کو بھی دہلی والوں کو آلودہ ہوا سے راحت رہی۔ اس دن دہلی کا اے کیو آئی 'خراب' زمرے میں 268 درج کیا گیا تھا جو کہ پیر کو 280 تھا یعنی 24 گھنٹے کے اندر اس میں 12 پوائنٹس کی کمی اور سدھار ہوا۔ ایئر کوالیٹی وارننگ سسٹم کے مطابق منگل کو سطحی ہوا ہلکی تھی۔ شام تک ہوا کی رفتار 16 کلومیٹر فی گھنٹہ سے کم تھی جس کے بعد شمال-مشرق سمت سے آنے والی ہوا کی رفتار 10 کلومیٹر فی گھنٹہ سے کم ہونے کی امید ہے۔

ویسے دہلی والوں کو گریپ-4 سے فی الحال راحت ملنے کا امکان کم نظر آ رہا ہے کیونکہ پیر کو دہلی کی فضائی آلودگی پر سپریم کورٹ نے تلخ تبصرہ کیا تھا۔ عدالت عظمیٰ نے گریڈیڈ ریسپانس ایکشن پلان (گریپ) کے مرحلہ 4 کے تحت فضائی آلودگی کے خلاف سخت پابندیوں میں نرمی دینے سے انکار کر دیا۔