نئے سال کی شام آج 7 بجے سے کناٹ پلیس میں گاڑیوں کا داخلہ بند، دہلی ٹریفک پولیس کی پابندیاں نافذ

نئے سال کے موقع پر جہاں نوجوان طبقہ مختلف انداز سے جشن منانے کی تیاری میں ہے وہیں دہلی پولیس نے بھی مستعدی کا پیغام دیتے ہوئے چاک و چوبند رہنے کا اشارہ دیا ہے۔ اس سلسلے میں دہلی ٹریفک پولیس بدھ کی شام 7 بجے سے کسی بھی گاڑی کو کناٹ پلیس کے انر، مڈل یا آؤٹر سرکل میں آنے یا جانے کی اجازت نہیں دے گی۔ ایسا اس لئے کیا جا رہا ہے تاکہ ٹریفک جام سے بچا جا سکے اور لوگ بغیر کسی پریشانی کے نئے سال کا جشن منا سکیں۔

ٹریفک پولیس نے بتایا کہ انڈیا گیٹ کے آس پاس علاقوں میں اگر بدھ کے روز زیادہ لوگ پیدل چلتے ہیں تو گا ڑیوں پر پابندی برقرار رہے گی۔ لوگوں کو پریشانی سے بچانے کے لیے نئے سال کی تقریبات ختم ہونے تک ٹریفک میں تبدیلی اور پارکنگ کے خصوصی انتظامات برقرار رہیں گے۔ اس کے علاوہ کناٹ پلیس کی طرف جانے والی گاڑیوں کو منڈی ہاؤس، بنگالی مارکیٹ، رنجیت سنگھ فلائی اوور، منٹو روڈ، پٹیل چوک اور دیگر علاقوں سے آگے جانے کی اجازت نہیں ہوگی۔ گول ڈاک خانہ، کالی باڑی مارگ، پنت مارگ، کاپرنکس مارگ، منٹو روڈ اور ونڈسر پلیس جیسے مقامات پر پہلے آؤ، پہلے پاؤ‘ کی بنیاد پرپارکنگ دستیاب ہو گی۔

نئے سال کا جشن منانے انڈیا گیٹ جانے والوں کے لیے ٹریفک پولیس نے کہا کہ لوگوں کو مشورہ دیا جاتا ہے کہ وہ پبلک ٹرانسپورٹ کا استعمال کریں کیونکہ انڈیا گیٹ پر پارکنگ کی جگہ محدود ہے۔ وہیں چڑیا گھرمیں بھی بڑی بھیڑ متوقع ہے، جس کی وجہ سے متھرا روڈ پر ٹریفک جام ہو سکتا ہے۔ اس لیے عام لوگ اور ڈرائیوروں کو مشورہ دیا جاتا ہے کہ وہ حضرت نظام الدین اور پرگتی میدان کے درمیان بھیروں روڈ، متھرا روڈ سے گریز کریں۔

نئی دہلی ریلوے اسٹیشن کی طرف جانے والے لوگوں کو تکلیف سے بچنے کے لیے متبادل راستوں جیسے آرایم ایل اسپتال روڈ، مندر مارگ، رانی جھانسی روڈ، یا ونڈسر پلیس کا استعمال کرنے کا مشورہ دیا گیا ہے۔ نئے سال کی شام سے پہلے دہلی پولیس اور ٹریفک پولیس نے راجدھانی میں بڑے پیمانے پر سیکورٹی آپریشن شروع کیا ہے۔ دہلی پولیس نے شہریوں پر زور دیا ہے کہ وہ پبلک ٹرانسپورٹ خصوصاً میٹرو کا استعمال کریں اور ہر حال میں نشے میں گاڑی چلانے سے گریز کریں۔

تقریبات کے دوران ٹریفک قوانین کی خلاف ورزی کرنے یا بد امنی پھیلانے والوں کے خلاف سخت کارروائی کی جائے گی۔ اس کے ساتھ ہی عام لوگوں اور گاڑی چلانے والوں کو مشورہ دیا جاتا ہے کہ وہ صبر و تحمل سے کام لیں، ٹریفک قوانین اور روڈ ڈسپلن کی پابندی کریں اور تمام چوراہوں پر تعینات ٹریفک اہلکاروں کی ہدایات پرعمل کریں۔ کسی بھی پریشانی کی صورت میں واٹس ایپ نمبر 8750871493 اور ہیلپ لائن نمبر 25844444-1095/011 کے ذریعہ اپ ڈیٹ رہیں۔