دہلی میں ’ٹھک ٹھک گینگ‘ کے دو ارکان گرفتار، لیپ ٹاپ اور اسکوٹی سمیت چوری کا سامان برآمد
دہلی پولیس نے ’ٹھک ٹھک گینگ‘ کے دو ارکان کو گرفتار کر لیا ہے، جو کار سواروں کا دھیان بھٹکا کر قیمتی اشیا چرا لیتے لیتے تھے۔گروہ کے قبضہ سے لیپ ٹاپ، اسکوٹی، بینک کارڈز اور دیگر دستاویزات برآمد ہوئے ہیں

نئی دہلی: قومی راجدھانی دہلی کے جنوب مغربی ضلع میں پولیس نے ’ٹھک ٹھک گینگ‘ کے دو سرگرم ارکان کو گرفتار کر لیا ہے، جو کار سواروں کا دھیان بھٹکا کر ان کا قیمتی سامان چرایا کرتے تھے۔ آر کے پورم تھانے کی ٹیم نے اس کارروائی کے دوران دونوں ملزمان سے لیپ ٹاپ، اسکوٹی، پین کارڈ، آدھار کارڈ، مختلف بینکوں کے ڈیبٹ اور کریڈٹ کارڈز سمیت اہم دستاویزات بھی برآمد کیے ہیں۔ گرفتار کیے گئے ملزمان کی شناخت سنجو عرف سنجو مدراسی (26) اور گورو عرف رنکو (26) کے طور پر ہوئی ہے، جو دونوں دہلی کے امبیڈکر نگر علاقے کے رہنے والے ہیں۔
پولیس کے مطابق یہ گینگ دہلی کے جنوب، جنوب مشرقی اور جنوب مغربی حصوں میں لوٹ، اسنیچنگ، چوری، دھوکہ دہی اور این ڈی پی ایس ایکٹ کے تحت درج متعدد مقدمات میں پہلے بھی ملوث رہا ہے۔ تفتیش کے دوران یہ بات سامنے آئی کہ دونوں ارکان اب تک مختلف تھانوں میں درج کم از کم 15 مقدمات کا حصہ رہ چکے ہیں۔
پولیس کارروائی کا آغاز 21 نومبر کی ایک واردات کے بعد ہوا، جب ایک شکایت گزار خاتون نے بتایا کہ وہ اوکھلا سے دوارکا اپنی گاڑی سے جا رہی تھیں۔ رِنگ روڈ پر حیات ہوٹل کے قریب دو نوجوان اسکوٹی پر آئے اور گاڑی میں خرابی کا اشارہ دے کر انہیں رکنے پر مجبور کیا۔ جیسے ہی وہ گاڑی سے اتریں، ان میں سے ایک نوجوان تیزی سے کار میں رکھا کالا بیگ اٹھا کر اسکوٹی سمیت فرار ہو گیا۔ معاملہ سنگین ہونے کے سبب فوری طور پر ایف آئی آر درج کی گئی اور تفتیش شروع کر دی گئی۔
ایس ایچ او آر کے پورم، انسپکٹر رویندر کمار تیاگی کی نگرانی میں ایک خصوصی ٹیم تشکیل دی گئی، جس نے جائے واردات کا معائنہ کیا۔ تفتیش کے دوران پولیس کو ایک اہم سراغ ملا جس کے نتیجے میں 23 نومبر کو گورو عرف رنکو کو گرفتار کر لیا گیا، جبکہ اگلے ہی روز 24 نومبر کو سنجو عرف سنجو مدراسی کو بھی پکڑ لیا گیا۔ دونوں کی نشاندہی پر چوری شدہ لیپ ٹاپ، دستاویزات اور واردات میں استعمال ہونے والی اسکوٹی برآمد کر لی گئی۔
پولیس کے مطابق ’ٹھک ٹھک گینگ‘ کا طریقۂ واردات خاصا منظم ہے۔ یہ گینگ اسکوٹی پر کار کے قریب آ کر پہلے ٹائر پنکچر جیسی فرضی خرابی کا اشارہ دیتا ہے، جس سے کار سوار گھبرا کر فوراً گاڑی سے باہر آ جاتا ہے۔ اسی لمحے گینگ کا دوسرا رکن کار کے اندر رکھا سامان تیزی سے نکال لیتا ہے۔ واردات کے فوراً بعد دونوں ارکان مختلف سمتوں میں فرار ہو جاتے ہیں تاکہ ان کا پیچھا کرنا مشکل ہو جائے۔
پولیس کا کہنا ہے کہ گرفتار ملزمان سے مزید پوچھ گچھ جاری ہے اور ٹیم اس بات کی بھی جانچ کر رہی ہے کہ یہ گینگ حالیہ دنوں میں پیش آنے والی دیگر وارداتوں میں بھی شامل تھا یا نہیں۔ پولیس کو توقع ہے کہ ان گرفتاریوں کے بعد ایسے واقعات میں کمی آئے گی، کیونکہ اس گینگ کی سرگرمیاں کار سوار شہریوں کے لیے مستقل خطرہ بنی ہوئی تھیں۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔