دہلی الیکشن: روڈ شو کے دوران ناراض لوگوں نے کیجریوال پر پھینکے پمفلٹ، پوچھے کئی سوال

عام آدمی پارٹی نے دوارکا سیٹ پر لال بہادر شاستری کے پوتے آدرش شاستری کی جگہ ونے کمار مشرا کو ٹکٹ دے دیا ہے۔ اس کے خلاف لوگوں کی ناراضگی اروند کیجریوال کے روڈ شو میں دیکھنے کو ملی۔

تصویر سوشل میڈیا
تصویر سوشل میڈیا
user

قومی آوازبیورو

دہلی کے دوارکا اسمبلی حلقہ میں پیر کے روز ایک روڈ شو کے دوران دہلی کے وزیر اعلیٰ اروند کیجریوال پر پمفلٹ پھینکے گئے۔ اروند کیجریوال اور ان کے روڈ شو کی لوگوں نے مخالفت کی۔ پمفلٹ میں موجودہ رکن اسمبلی کو ہٹانے کے بارے میں سوال پوچھا گیا تھا۔ پمفلٹ میں کیجریوال سے یہ سوال کیا گیا تھا کہ ’’ونے مشرا نے اس سیٹ کے لیے آپ کو کتنے روپے دیے؟‘‘

قابل ذکر ہے کہ عام آدمی پارٹی نے دوارکا سیٹ پر لال بہادر شاستری کے پوتے آدرش شاستری کی جگہ ونے کمار مشرا کو ٹکٹ دے دیا ہے۔ ونے مشرا، مہابل مشرا کے بیٹے ہیں۔ ٹکٹ نہیں ملنے پر شاستری کانگریس میں چلے گئے اور اسی سیٹ سے کانگریس کے ٹکٹ پر وہ انتخاب لڑ رہے ہیں۔


آدرش شاستری نے 2015 کے الیکشن میں عآپ کی ٹکٹ پر 59.08 ووٹ حاصل کر زبردست کامیابی حاصل کی تھی۔ پمفلٹ میں لکھا تھا ’’دوارکا کی عوام پوچھتی ہے کہ مشرا نے کتنے روپے دیے تھے؟ کیجریوال واپس جاؤ۔‘‘ ایک دیگر پمفلٹ میں لکھا تھا ’’دوارکا نے فیصلہ کر لیا ہے کہ مشرا کی ضمانت تک ضبط ہو جائے گی۔‘‘

واضح رہے کہ کیجریوال دہلی میں لگاتار اپنے امیدواروں کے حق میں روڈ شو کر رہے ہیں۔ پیر کے روز انھوں نے پالم اور دوارکا میں روڈ شو کیا۔ دہلی میں 8 فروری کو ووٹنگ ہونی ہے اور 11 فروری کو نتیجہ سامنے آئے گا۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔