دہلی میونسپل کارپوریشن کی 12 سیٹوں پر ضمنی انتخاب کا اعلان، 30 نومبر کو ووٹنگ، 3 دسمبر کو آئے گا نتیجہ

دہلی اسٹیٹ الیکشن کمیشن نے منگل کے روز ایم سی ڈی کی 12 سیٹوں پر ضمنی انتخاب کرانے کا اعلان کر دیا۔ دی گئی جانکاری کے مطابق 30 نومبر کو ووٹنگ ہوگی اور نتائج 3 دسمبر کو سامنے آئیں گے۔ 12 وارڈوں میں ضمنی انتخاب کرائے جا رہے ہیں تاکہ خالی پڑی سیٹوں پر نئے کونسلروں کا انتخاب ہو سکے۔

ایم سی ڈی ضمنی انتخاب کے لیے پرچۂ نامزدگی داخل کرنے کا عمل 3 نومبر سے شروع ہو جائے گا۔ امیدوار 10 نومبر تک اپنا پرچۂ نامزدگی داخل کر سکیں گے، اور اس کے بعد 12 نومبر کو پرچوں کی جانچ کی جائے گی۔ 15 نومبر تک امیدوار اگر چاہیں تو اپنا نام واپس لے سکتے ہیں۔ 30 نومبر کو صبح 7.30 بجے سے شام 5.30 بجے تک بغیر کسی بریک کے ووٹنگ ہوگی۔ ووٹوں کی گنتی 3 دسمبر کو ہوگی، یعنی ووٹنگ کے 3 دن بعد نتائج سامنے آ جائیں گے۔

یہ ضمنی انتخاب جن 12 وارڈوں میں ہوں گے، ان کے نام ہیں منڈکا، شالیمار باغ-بی، اشوک وِہار، چاندنی چوک، چاندنی محل، دوارکا-بی، دچاؤں کلاں، نارائنا، سنگم وِہار-اے، دکشن پوری، گریٹر کیلاش اور ونود نگر۔ شالیمار باغ-بی وارڈ پہلے دہلی کی وزیر اعلیٰ ریکھا گپتا کے پاس تھی۔ دوارکا-بی وارڈ بی جے پی کونسلر کمل جیت سہراوت کے ہٹنے کے بعد خالی ہوا، کیونکہ وہ مغربی دہلی سے لوک سبھا رکن بن گئیں۔ باقی وارڈس پر بی جے پی اور عآپ کے وہ کونسلر تھے، جو فروری میں دہلی اسمبلی انتخاب لڑ کر رکن اسمبلی بن گئے۔ اب ضمنی انتخاب کے ذریعہ ان سبھی سیٹوں کو بھرا جائے گا۔