دہلی اقلیتی کانگریس نے ایگزیکٹیو ممبرشپ مہم کا کیا آغاز، رکن پارلیمنٹ عمران پرتاپ گڑھی نے فارم کا کیا اجرا

نئی دہلی: آل انڈیا کانگریس کمیٹی کے صدر دفتر 24 اکبر روڈ پر کانگریس اقلیتی شعبہ کے قومی چیئرمین و رکن پارلیمنٹ عمران پرتاپ گڑھی کی صدارت میں گزشتہ روز دہلی پردیش کانگریس کمیٹی اقلیتی شعبہ کی ایک اہم میٹنگ منعقد ہوئی۔ میٹنگ میں دہلی اقلیتی کانگریس کے تنظیمی امور کا جائزہ لیا گیا اور مستقبل میں پارٹی کے حق میں ہونے والی سبھی سرگرمیوں پر تفصیلی تبادلہ خیال کیا گیا۔

میٹنگ کے تعلق سے بات کرتے ہوئے دہلی کانگریس اقلیتی شعبہ کے چیئرمین عبدالواحد قریشی نے بتایا کہ مستقبل میں کانگریس پارٹی کی مزید مضبوطی کے لیے 2 اہم نکات پر تفصلی گفتگو ہوئی۔ پہلا یہ کہ ایگزیکٹیو ممبرشپ مہم کا بنیادی مقصد پارٹی کو زمینی سطح پر مضبوط بنانے کے لیے ایسے لوگوں کو ممبر بنانا ہے جو پوری محنت و لگن کے ساتھ کام کر سکیں اور اپنے اپنے علاقوں میں سرگرم ہوں۔ اس مہم کا باقاعدہ آغاز میٹنگ کے دوران عمران پرتاپ گڑھی نے ممبر شپ فارم کا اجرا کرتے ہوئے کیا۔ دوسرا یہ کہ ضلع سطح کا سیاسی بیداری مشن کانگریس کی پالیسیوں، آئینی اقدار اور عوامی مفاد کے مسائل پر اضلاع میں وسیع پیمانے پر رسائی اور بیداری کے پروگرام منعقد کرے گا۔

عبدالواحد قریشی نے کہا کہ دہلی کانگریس کا اقلیتی شعبہ کا ہر رکن پارٹی کے لیے کنبہ کے فرد کی مانند ہے اور یہی وجہ ہے کہ شعبہ میں ہر کس و ناکس کی نہ صرف بات سنی جاتی ہے بلکہ ان کی رائے و مشورے پر غور و خوص کیا جاتا ہے، اس کے بعد ہی اقلیتی شعبہ فیصلہ لیتا ہے۔ انھوں نے کہا کہ آج کی میٹنگ میں یہ بات پوری طرح واضح ہو گئی ہے کہ شعبہ کے عہدیداران پوری ذمہ داری کے ساتھ ممبر شپ میں زیادہ سے زیادہ سرگرم اور پارٹی کو مزید مضبوطی دینے والے ممبر جوڑیں گے۔

میٹنگ میں رکن پارلیمنٹ عمران پرتاپ گڑھی نے سیدھے طور پر لوگوں سے بات چیت کی اور ان کے شک و شبہات دور کیے اور ان کو کام کرنے کے بہترین مشوروں سے بھی نوازا۔ اس میٹنگ میں دہلی اقلیتی کانگریس کے انچارج شبلی منظور، شریک انچارج الطاف حسین، چیئرمین عبدالواحد قریشی سمیت ضلع اور ریاستی سطح کے سینکڑوں عہدیدار موجود تھے۔

اخیر میں چیئرمین عبدالواحد قریشی نے الیکشن کمیٹی (پی ای سی) کا رکن مقرر کرنے پر کانگریس اعلی کمان اور عمران پرتاپ گڑھی کا شکریہ ادا کیا۔ میٹنگ میں یہ بھی واضح کیا گیا کہ دونوں مہموں کو آنے والے دنوں میں زمینی سطح پر نافذ کیا جائے گا۔ تاہم پارٹی کو مضبوط بنانے کے لیے عوام سے براہ راست رابطہ قائم کیا جائے گا۔ اس اقدام کو تنظیمی توسیع کی جانب ایک اہم قدم قرار دیا جا رہا ہے۔