دہلی میئر انتخاب: بی جے پی اور عآپ کونسلروں کی شدید ہنگامہ آرائی کے درمیان ووٹنگ ملتوی

دہلی ایم سی ڈی انتخابات کے لیے صبح 11 بجے سے ووٹنگ ہونا تھی لیکن ہنگامہ آرائی کی وجہ سے ووٹنگ ڈیڑھ بجے تک بھی شروع نہیں ہو سکی۔ آخرکار ایم سی ڈی ایوان کی کارروائی اور میئر انتخاب کے لئے ووٹنگ ملتوی کر دی گئی۔ اطلاع کے مطابق اب میئر انتخابت کے لئے ووٹنگ کل کی جائے گی۔ دریں اثنا، سوک سینٹر میں کونسلروں نے اس قدر ہنگامہ آرائی کی کہ مشتعل ہو کر ایک دوسرے پر کرسیاں تک پھینکا شروع کر دیں۔ بی جے پی اور عام آدمی پارٹی ایک دوسرے پر ہنگامہ آرائی کا الزام لگایا۔

ایم سی ڈی کے میئر کے انتخاب میں ووٹ ڈالنے سے پہلے کونسلرز کو حلف دلایا جائے گا۔ حلف برداری سے قبل عام آدمی پارٹی کونسلروں نے ہنگامہ کیا۔ عآپ کارپوریٹر نامزد اراکین کے لیے پہلے حلف لینے کے خلاف احتجاج کر رہے ہیں۔ اس دوران عآپ اور بی جے پی کارپوریٹروں کے درمیان ہاتھاپائی ہو گئی۔

ایم سی ڈی کے عہدیداروں کے انتخابات کے لیے کلر کوڈ مقرر کر دئے گئے ہیں۔ سفید بیلٹ پیپر کے ذریعے میئر کا انتخاب ہوگا، ڈپٹی میئر کے انتخاب کے لیے گرین بیلٹ جبکہ قائمہ کمیٹی کے ارکان کے لیے گلابی بیلٹ پیپر کا استعمال کیا جائے گا۔

میئر عہدے کے لئے عام آدمی پارٹی نے شیلی اوبرائے جبکہ بی جے پی نے ریکھا گپتا کو امیدوار مقرر کیا ہے۔ ڈپٹی میئر انتخاب کے لئے عام آدم پارٹی کےک آلِ محمد اقبال اور بی جے پی کے کمل باگڑی میدان میں ہیں۔ قائمہ کمیٹی کے لئے 6 سیٹوں پر 7 امیدوار مقابلہ کر رہے ہیں۔ عام آدمی پارٹی نے عامل ملک، رامیندر کور، موہنی جینوال اور ساریکا چودھری امیدوار بنایا ہے جبکہ بی جے پی نے کمل جیت سہراوت، گجندر درال اور پنکج لوتھرا کو امیدوار بنایا ہے۔

کانگریس نے کہا کہ دہلی کے لوگوں نے بی جے پی اور عام آدمی پارٹی کے خلاف کانگریس کا ساتھ دیا ہے۔ جس کا احترام کرتے ہوئے ہم میئر، ڈپٹی میئر اور اسٹینڈنگ کمیٹی کے انتخاب سے خود کو دور رکھیں گے۔ پارٹی نے کہا کہ دہلی کے لوگوں نے کیجریوال کو اکثریت دی ہے لہذا انہیں اپنا میئر بنا کر دہلی کے لوگوں کی خدمت کرنی چاہئے۔ کانگریس پارٹی نے نازیہ دانش کو ایم سی ڈی میں کانگریس پارٹی کی لیڈر، شیتل کو ڈپٹی لیڈر اور شگفتہ چودھری کو کارپوریشن میں کانگریس پارٹی کا چیف وہپ مقرر کیا ہے۔

انتخابات سے پہلے دہلی حکومت اور لیفٹیننٹ گورنر کے درمیان ایک بار پھر جنگ شروع ہو گئی۔ یہ تنازعہ ایل جی کی طرف سے پریزائیڈنگ آفیسر کی تقرری سے متعلق ہے۔ ایل جی نے جمعہ کو ہونے والے میئر انتخابات کے لیے بی جے پی کونسلر ستیہ شرما کو پریزائیڈنگ آفیسر مقرر کیا ہے، جس پر عآپ نے اعتراض ظاہر کیا ہے۔ دہلی حکومت نے پریزائیڈنگ آفیسر کے لیے عام آدمی پارٹی نے ایل جی سے اپنے کونسلر مکیش گوئل کے نام کی سفارش کی تھی۔