دہلی شراب پالیسی معاملہ: سسودیا کی درخواست ضمانت پر آج ہوگی سماعت، سی بی آئی نے کل کی تھی مخالفت

نئی دہلی: دہلی ہائی کورٹ جمعرات کو 2021-22 ایکسائز پالیسی کیس کے سلسلہ میں دہلی کے سابق نائب وزیر اعلی منیش سسودیا کی عبوری ضمانت کی درخواست پر سنٹرل بیورو آف انویسٹی گیشن (سی بی آئی) کے دلائل کی سماعت کرے گا۔ سی بی آئی نے بدھ کو ضمانت کی درخواست کی مخالفت کرتے ہوئے کہا کہ اے اے پی لیڈر اقتدار میں ہے اور سیاسی اثر و رسوخ کے حامل ہیں

ایڈیشنل سالیسٹر جنرل (اے ایس جی) ایس وی راجو نے جانچ ایجنسی کی طرف سے پیش ہوتے ہوئے کہا کہ سسودیا نے ایکسائز سمیت مختلف محکموں کو کنٹرول کیا اور جس دن لیفٹیننٹ گورنر نے کیس سی بی آئی کو بھیج دیا تھا، اس جان بوجھ کر ثبوت اور ایک موبائل فون کو تباہ کر دیا۔

جسٹس دنیش کمار شرما کی بنچ کے سامنے سی بی آئی نے پالیسی دستاویزات سے متعلق ایک گمشدہ فائل کا بھی حوالہ دیا اور کہا کہ ہو سکتا ہے کہ یہ غائب ہو گئی ہو کیونکہ اس میں کچھ ایسے تبصرے تھے جو پسندیدہ نہیں تھے۔

سسودیا نے اپنی بیوی کی بیماری کی وجہ سے اس کیس میں عبوری ضمانت کے لیے 3 اپریل کو ہائی کورٹ کا رخ کیا تھا۔ دہلی کی ایک عدالت نے پیر کو ایک اور معاملے میں سسودیا کی عدالتی تحویل میں 23 مئی تک توسیع کر دی۔ سسودیا کو سی بی آئی نے 26 فروری کو اور ای ڈی نے 9 مارچ کو گرفتار کیا تھا۔ سی بی آئی کی طرف سے جانچ کے معاملے میں دہلی کی ایک عدالت نے سسودیا کی عدالتی حراست میں 12 مئی تک توسیع کر دی تھی۔