دہلی ہوٹل آتشزدگی: اپنے پیاروں کی تلاش میں بے قرار اہل خانہ، لاشوں کی شناخت بھی مشکل

جنوبی دہلی کے مالویہ نگر علاقے میں واقع ایک ہوٹل میں پیش آنے والے ہولناک آتشزدگی کے واقعے کے بعد راجدھانی کے مختلف اسپتالوں میں غم، بے چینی اور اضطراب کا ماحول دیکھنے کو ملا۔ حادثے میں کم از کم 21 افراد کی جان چلی گئی، جبکہ متعدد زخمیوں کو علاج کے لیے اسپتالوں میں داخل کرایا گیا۔

ساکیت کے میکس اسپتال کی انتظار گاہ میں بدھ کے روز بڑی تعداد میں ایسے افراد جمع تھے جو اپنے رشتہ داروں، دوستوں اور جاننے والوں کے بارے میں معلومات حاصل کرنے کی کوشش کر رہے تھے۔ کوئی اسپتال کی فہرستیں دیکھ رہا تھا، کوئی مسلسل فون کر رہا تھا اور کئی لوگ حکام سے اپنے عزیزوں کے بارے میں معلومات مانگتے دکھائی دیے۔

اس دوران حادثے کے متاثرین کو شناخت اور علاج کے لیے اسپتال لایا جاتا رہا۔ کئی خاندانوں کے لیے سب سے بڑا مسئلہ لاشوں کی شناخت بن گیا ہے کیونکہ شدید آگ کے باعث متعدد لاشیں بری طرح جھلس چکی ہیں۔ ایک غم زدہ رشتہ دار نے بتایا کہ تصاویر کی مدد سے بھی اپنے عزیزوں کو پہچاننا ممکن نہیں ہو پا رہا کیونکہ سب کے جسم بری طرح متاثر ہوئے ہیں۔

نمیت گوئل نامی شخص نے بتایا کہ ان کے خاندان کے چھ افراد اس حادثے کی زد میں آ گئے تھے۔ ان کے مطابق چار لاشوں کی شناخت ہو چکی ہے جبکہ دو افراد کی شناخت ابھی باقی ہے۔ انہوں نے کہا کہ چار لاشیں میکس ساکیت کے مردہ خانے میں موجود ہیں جبکہ دو دیگر لاشیں ایک دوسرے اسپتال میں رکھی گئی ہیں، جن کا سراغ لگانے کی کوشش کی جا رہی ہے۔

متاثرہ خاندان کے افراد نے بتایا کہ یہ تمام لوگ علاج کے سلسلے میں گروگرام سے دہلی آئے تھے اور حادثے کے وقت اسی ہوٹل میں مقیم تھے۔

دوسری جانب وویک نامی شخص اپنی 25 سالہ دوست سُجیتا کی تلاش میں اسپتال پہنچا۔ اس نے بتایا کہ پولیس نے شناخت کے لیے متعدد تصاویر دکھائیں لیکن وہ اپنی دوست کو پہچان نہیں سکا۔ اس کا کہنا تھا کہ سجیتا کا موبائل فون بھی بند آ رہا ہے، جس سے اہل خانہ اور دوستوں کی تشویش مزید بڑھ گئی ہے۔

یہ آتشزدگی حوض رانی کے گنجان آباد علاقے میں واقع ’فلرش اسٹے‘ نامی ہوٹل میں پیش آئی۔ عینی شاہدین کے مطابق آگ لگنے کے بعد پوری عمارت دھوئیں کی لپیٹ میں آ گئی اور اندر موجود لوگ جان بچانے کے لیے بدحواسی کے عالم میں باہر نکلنے کی کوشش کرتے رہے۔

پولیس کے مطابق حادثے میں 21 افراد ہلاک ہوئے ہیں جبکہ 40 سے زائد افراد کو محفوظ طریقے سے باہر نکال لیا گیا۔ حکام کا کہنا ہے کہ آگ لگنے کی اصل وجہ کا ابھی تک پتہ نہیں چل سکا ہے اور معاملے کی جانچ جاری ہے۔