دہلی کانگریس کے میگا جاب فیئر کا انعقاد، 6500 ہزار سے زائد نوجوانوں کو ملازمت کی پیشکش

نئی دہلی: کانگریس رہنما اور قائد حزب اختلاف راہل گاندھی کی سالگرہ کے موقع پر انڈین یوتھ کانگریس اور دہلی کانگریس کمیٹی کے زیر اہتمام تالکٹورا اسٹیڈیم میں ایک میگا جاب فیئر کا انعقاد کیا گیا، جس میں 150 سے زائد قومی اور بین الاقوامی کمپنیوں نے حصہ لیا۔ منتظمین کے مطابق اس روزگار میلے میں 20 ہزار سے زیادہ تعلیم یافتہ اور تربیت یافتہ بے روزگار نوجوان شریک ہوئے، جن میں سے 6500 سے زائد امیدواروں کو موقع پر ہی ملازمت کی پیشکش کی گئی، جبکہ سیکڑوں نوجوانوں کو مزید انٹرویو کے لیے طلب کیا گیا۔

تقریب کا آغاز شمع روشن کرنے اور قومی ترانے سے کیا گیا۔ اس موقع پر دہلی کانگریس کے صدر دویندر یادو نے کہا کہ گزشتہ 12 برسوں میں بی جے پی حکومت روزگار کے مواقع فراہم کرنے میں ناکام رہی ہے، جس کے نتیجے میں ملک میں بے روزگاری کی شرح میں مسلسل اضافہ ہوا ہے۔ انہوں نے کہا کہ مسلسل دوسرے سال منعقد ہونے والا یہ میگا جاب فیئر نوجوانوں کو بہتر مستقبل فراہم کرنے کی ایک سنجیدہ کوشش ہے۔

دویندر یادو نے کہا کہ ایسے وقت میں جب نوجوانوں کی ایک بڑی تعداد کو روزگار کے حوالے سے مایوسی کا سامنا ہے، راہل گاندھی کی سالگرہ کے موقع پر ہزاروں نوجوانوں کو روزگار کے مواقع فراہم کرنا ایک مثبت پیغام ہے۔ انہوں نے امتحانی پرچوں کے لیک ہونے کے واقعات پر تشویش ظاہر کرتے ہوئے اس مسئلے کا مستقل حل نکالنے کا مطالبہ بھی کیا۔

انڈین یوتھ کانگریس کے قومی صدر ادے بھانو چب نے کہا کہ وزیر اعظم نریندر مودی نے ہر سال دو کروڑ نوجوانوں کو روزگار فراہم کرنے کا وعدہ کیا تھا، لیکن ملک میں بے روزگاری اور معاشی مشکلات میں اضافہ ہوا ہے۔ انہوں نے کہا کہ نیٹ، جے ای ای اور ایس ایس سی کے امتحانات سمیت مختلف مسابقتی امتحانات میں پرچہ لیک ہونے کے واقعات نے لاکھوں نوجوانوں کے مستقبل کو متاثر کیا ہے۔

انہوں نے کہا کہ تعلیم اور صحت کا شعبہ ایک وصولی کے نظام میں تبدیل ہوتا جا رہا ہے اور پرچہ لیک ہونے کی خبریں طلبہ اور امیدواروں کی محنت کو ضائع کر دیتی ہیں۔

دویندر یادو نے کہا کہ اگر کانگریس اپوزیشن میں رہتے ہوئے ہزاروں نوجوانوں کو روزگار کے مواقع فراہم کر سکتی ہے تو اقتدار میں آنے کے بعد وہ نوجوانوں کو ان کی تعلیمی قابلیت کے مطابق روزگار فراہم کرنے کی کوشش کرے گی۔ انہوں نے کہا کہ راہل گاندھی مسلسل مرکزی حکومت سے سرکاری محکموں میں خالی پڑے لاکھوں عہدوں کو بھرنے کا مطالبہ کرتے رہے ہیں۔

بعد ازاں دویندر یادو نے 24 اکبر روڈ پر واقع آل انڈیا کانگریس کمیٹی کے صدر دفتر پہنچ کر راہل گاندھی کو سالگرہ کی مبارک باد پیش کی۔ اس موقع پر دہلی کانگریس کے سیکڑوں کارکنان موجود تھے۔ جاب فیئر میں کانگریس کے جنرل سکریٹری سچن پائلٹ، دہلی انچارج قاضی نظام الدین، این ایس یو آئی کے صدر ونود جاکھڑ، سابق وزیر ڈاکٹر نریندر ناتھ، انل بھاردواج، اکشے لاکڑا اور دیگر کانگریسی رہنما اور کارکنان بھی شریک ہوئے۔