دہلی میں اسمبلی انتخاب کی تاریخ کا اعلان، 8 فروری کو ووٹنگ، 11 فروری کو کاؤنٹنگ

دہلی اسمبلی کی مدت 22 فروری کو ختم ہو رہی ہے اس لیے ووٹنگ 8 اور ووٹوں کی گنتی کے لیے 11 فروری کی تاریخ مقرر کی گئی ہے۔ تاریخ کا اعلان کرتے ہوئے انتخابی کمیشن نے بورڈ امتحانات کو بھی دھیان میں رکھا ہے۔

تصویر سوشل میڈیا
تصویر سوشل میڈیا
user

قومی آوازبیورو

انتخابی کمیشن نے دہلی اسمبلی انتخاب کی تاریخ کا اعلان کر دیا ہے۔ چیف الیکشن کمشنر سنیل اروڑا نے پریس کانفرنس کے دوران واضح کیا کہ 8 فروری کو دہلی میں اسمبلی انتخاب ایک ہی مرحلہ میں اختتام پذیر ہوگا اور ووٹوں کی گنتی 11 فروری کو ہوگی۔ ساتھ ہی چیف الیکشن کمشنر نے فوری اثر سے دہلی میں انتخابی ضابطہ اخلاق نافذ کرنے کا بھی اعلان کر دیا ہے۔

پریس کانفرنس کے دوران سنیل اروڑا نے کہا کہ انتخاب سے متعلق نوٹیفکیشن 14 جنوری کو جاری ہو جائے گا جب کہ 21 جنوری امیدواروں کے ذریعہ نامزدگی کا پرچہ داخل کرنے کی آخری تاریخ ہوگی۔ اس کے علاوہ اسکروٹنی کے لیے 23 جنوری کی تاریخ مقرر کی گئی ہے اور پھر امیدواروں کے ذریعہ نامزدگی واپس لینے کی تاریخ 24 جنوری ہے۔

قابل ذکر ہے کہ دہلی کی موجودہ اسمبلی کی مدت 22 فروری 2020 کو ختم ہو رہی ہے۔ تاریخوں کا اعلان کرتے ہوئے انتخابی کمیشن نے بورڈ امتحان کو بھی دھیان میں رکھا ہے۔ کمیشن کے مطابق ووٹنگ کے لیے اسکولوں کا استعمال کیا جاتا ہے اس لیے 15 فروری سے شروع ہونے والے بورڈ امتحانات سے پہلے ہی اسمبلی انتخاب کے لیے ووٹنگ کا عمل پورا کر لیا جائے گا۔

پریس کانفرنس کے دوران چیف الیکشن کمشنر سنیل اروڑا نے بتایا کہ دہلی میں اس مرتبہ 2689 ووٹنگ مقامات ہوں گے جن پر 13750 ووٹنگ مراکز قائم کیے جائیں گے۔ ہر اسمبلی حلقہ میں ایک ماڈل ووٹنگ مرکز ہوگا۔ گزشتہ اسمبلی انتخاب میں ووٹنگ مقامات کی تعداد 2530 تھی جب کہ لوک سبھا الیکشن میں یہ تعداد 2700 تھی۔

واضح رہے کہ گزشتہ سال ہوئے لوک سبھا انتخاب میں دہلی کی سبھی 7 لوک سبھا سیٹوں پر بی جے پی نے قبضہ کر لیا تھا۔ انتخابی کمیشن نے دہلی میں ووٹروں کی نئی فہرست بھی جاری کی ہے۔ اس فہرست میں جن لوگوں کا نام نہیں ہوگا انھیں ووٹ کرنے کا حق نہیں دیا جائے گا۔ لوک سبھا انتخاب کے وقت انتخابی کمیشن کے ذریعہ جاری کی گئی فہرست میں دہلی میں 1 کروڑ 43 لاکھ 16 ہزار 453 ووٹرس تھے۔ ان میں 79.73 لاکھ مرد جب کہ 65.73 لاکھ خاتون ووٹرس تھے۔ اس کے علاوہ ٹرانس جینڈر ووٹروں کی تعداد تقریباً 700 تھی۔ اس مرتبہ تقریباً 2.5 لاکھ نئے ووٹر اس فہرست میں شامل ہوئے ہیں۔ اس طرح سے دہلی میں ووٹروں کی تعداد 14692136 ہو گئی ہے۔ ان میں 80.55 لاکھ مرد جب کہ 66.35 لاکھ خاتون ووٹرس ہیں۔

گزشتہ اسمبلی انتخاب میں دہلی کی 70 اسمبلی سیٹوں میں سے 67 پر قبضہ کر کے عام آدمی پارٹی نے مکمل اکثریت کے ساتھ تاریخی کامیابی حاصل کی تھی۔ بقیہ کی 3 سیٹیں بی جے پی کے حصے میں گئی تھیں۔ نئی دہلی انتخابی حلقہ سے بی جے پی امیدوار کرن بیدی کو شکست دے کر کیجریوال نے یہاں فتح کا پرچم لہرایا تھا۔

next