گوا میں دیپک سنگلا کی گرفتاری پر کیجریوال کا ردعمل، ’بی جے پی میں شامل نہ ہونے کی سزا دی گئی‘

نئی دہلی: گوا میں عام آدمی پارٹی کے شریک انچارج دیپک سنگلا کی گرفتاری اور ان کے ٹھکانوں پر انفورسمنٹ ڈائریکٹوریٹ یعنی ای ڈی کی کارروائی کے بعد سیاسی ماحول گرم ہو گیا ہے۔ عام آدمی پارٹی نے اس کارروائی کو سیاسی انتقام قرار دیتے ہوئے مرکز کی بی جے پی حکومت پر مرکزی ایجنسیوں کے غلط استعمال کا الزام عائد کیا ہے۔ پارٹی رہنماؤں کا کہنا ہے کہ اپوزیشن کی آواز دبانے کے لیے جان بوجھ کر کارروائیاں کی جا رہی ہیں۔

عام آدمی پارٹی کے قومی کنوینر اروند کیجریوال نے کہا کہ دیپک سنگلا کو کسی غیر قانونی کام کی وجہ سے گرفتار نہیں کیا گیا بلکہ ان کا قصور صرف یہ ہے کہ انہوں نے بی جے پی کے خلاف سیاسی سرگرمیاں جاری رکھیں اور حکمراں جماعت میں شامل ہونے سے انکار کر دیا۔ انہوں نے کہا کہ دیپک سنگلا اور پنجاب سے راجیہ سبھا رکن سنجیو اروڑا جیسے رہنما بہادر اور وطن دوست ہیں اور عوام ان کے ساتھ کھڑی ہے۔

گوا کی انچارج اور دہلی اسمبلی میں قائد حزب اختلاف آتشی نے کہا کہ ملک اس وقت بے روزگاری، مہنگائی، پٹرول، ڈیزل اور سی این جی کی بڑھتی قیمتوں جیسے سنگین مسائل سے دوچار ہے، لیکن مرکزی حکومت اپوزیشن رہنماؤں کے خلاف کارروائیوں میں مصروف ہے۔ انہوں نے دعویٰ کیا کہ گوا میں عام آدمی پارٹی کی بڑھتی مقبولیت سے بی جے پی پریشان ہے اور آئندہ اسمبلی انتخابات کے پیش نظر مرکزی ایجنسیوں کو استعمال کیا جا رہا ہے۔

آتشی نے مزید کہا کہ مغربی بنگال اسمبلی انتخابات کے دوران بھی مرکزی ایجنسیوں کا استعمال اپوزیشن جماعتوں کے خلاف کیا گیا تھا۔ ان کے مطابق اس وقت انتخابی حکمت عملی اور اہم اعداد و شمار حاصل کرنے کے لیے چھاپے مارے گئے تھے اور اب گوا میں بھی اسی طرز کی کارروائیاں دہرائی جا رہی ہیں۔ انہوں نے الزام لگایا کہ صرف بڑے رہنماؤں ہی نہیں بلکہ عام کارکنان کے گھروں پر بھی چھاپے مارے جا رہے ہیں۔

عام آدمی پارٹی کے رہنما منیش سسودیا نے سوشل میڈیا پلیٹ فارم ایکس پر کہا کہ بی جے پی مرکزی ایجنسیوں کے ذریعے اپوزیشن کو انتخابی طور پر کمزور کرنے کی کوشش کر رہی ہے، لیکن اس سے ملک کی معاشی مشکلات یا روپے کی گرتی قدر نہیں رک سکتی۔ دوسری جانب سوربھ بھاردواج نے بھی الزام لگایا کہ ای ڈی، سی بی آئی اور دیگر ایجنسیوں کے ذریعے عام آدمی پارٹی کے رہنماؤں کو مسلسل ہراساں کیا جا رہا ہے۔

پارٹی نے واضح کیا کہ وہ ان کارروائیوں سے خوفزدہ ہونے والی نہیں ہے اور گوا میں بی جے پی حکومت کے خلاف اپنی سیاسی مہم جاری رکھے گی۔