کیجریوال کے داماد سمبھو جین نے 13 لاکھ کروڑ روپے کی کمپنی میں کام کیا، پھر اے آئی اسٹارٹ اپ شروع کیا

دہلی کے سابق وزیر اعلیٰ اور عام آدمی پارٹی (اے اے پی) کے کنوینر اروند کیجریوال کی بیٹی ہرشیتا کیجریوال نے سمبھو جین سے شادی کر لی ہے۔ شادی جمعہ کو دہلی کے تاریخی کپورتھلہ ہاؤس میں ہوئی جس میں بہت ہی منتخب مہمانوں کو مدعو کیا گیا تھا۔ استقبالیہ کا اہتمام 20 اپریل کو کیا جائے گا۔

اروند کیجریوال کے داماد سمبھو جین نے یوٹیوب چینل دی انٹرپرائز ورلڈ کو انٹرویو دیتے ہوئے کہا تھا کہ ان کی کمپنی کا نام ’انٹریکٹ‘ہے جسے انہوں نے اپنے دوستوں کے ساتھ مل کر بنایا ہے۔ اس کے علاوہ ایک اور انٹرویو میں سمبھو جین نے بتایا تھا کہ اپنی کمپنی شروع کرنے سے پہلے وہ بلیک اسٹون میں کام کر چکے ہیں۔ واضح رہےکہ اس وقت بلیک اسٹون کا بازار سرمایہ 158.90 بلین امریکی ڈالر یعنی تقریباً 13.26 لاکھ کروڑ روپے ہے۔

ہرشیتا اور سمبھو دونوں آئی آئی ٹی دہلی کے طالب علم رہے ہیں اور وہاں سے انجینئرنگ کی تعلیم مکمل کی ہے۔ کالج کے دنوں کی دوستی اب مضبوط رشتے میں بدل چکی ہے۔ شادی سے پہلے دونوں کی منگنی دہلی کے فائیو اسٹار ہوٹل شنگری لا ایروز میں ہوئی تھی۔ خاص بات یہ ہے کہ دونوں نے حال ہی میں ایک ساتھ اسٹارٹ اپ شروع کیا ہے اور اسے ساتھ لے کر آگے بڑھ رہے ہیں۔

شادی کی تصاویر اور ویڈیوز سوشل میڈیا پر وائرل ہو رہی ہیں، جس میں اروند کیجریوال سفید شیروانی میں، ان کی اہلیہ سنیتا کیجریوال سرخ ساڑھی میں اور بیٹا پلکت کیجریوال روایتی لباس میں نظر آ رہے ہیں۔ شادی کی تقریب میں پنجاب کے وزیر اعلیٰ بھگونت مان بھی موجود تھے اور خاندان کے تمام افراد کے ساتھ رقص کرتے نظر آئے۔ ہرشیتا نے اپنی تعلیم مکمل کرنے کے بعد گڑگاؤں کی ایک کمپنی میں کچھ عرصہ ملازمت بھی کی۔ اب وہ اپنے شوہر کے ساتھ ایک نئے کاروبار کی طرف کام کر رہی ہیں۔