دوسری بیوی خودکشی کی وجہ، بھیوجی کی بیٹی کا الزام

بھیو جی مہاراج کی بیٹی کوہو کے اس بیان کے بعد کہ ان کے والد کی خودکشی کے لئے ان کی سوتیلی ماں ذمہ دار ہیں ۔ مہاراج کی بیٹی یہیں تک نہیں رکیں بلکہ انہوں نے کہا کہ بھیو جی مہاراج کی دوسری اہلیہ ڈاکٹر آیوشی کو جیل میں ڈال دیا جائے۔ واضح رہے ڈاکٹر آیوشی کا کہنا ہے کہ چونکہ کوہو انہیں پسند نہیں کرتی اس لئے وہ ایسی باتیں کر رہی ہے بلکہ ان کے گرو جی کے ساتھ خوشگوار تعلقات تھے۔ کوہو بھیو جی مہاراج کی پہلی بیوی کی اولاد ہیں اور وہ پونے میں تعلیم حاصل کر رہی ہیں ۔ بھیوجی مہاراج نے 30 اپریل 2017 کو مدھیہ پردیش، شیو پوری کی ڈاکٹر آیوشی کے ساتھ شادی کی تھی۔

یہ بھی پڑھیں: مدھیہ پردیش: بھیو مہاراج نے کی خود کشی، شیوراج نے دیا تھا وزیر مملکت کا درجہ

بھیو جی مہاراج کی آخری رسومات اندور میں ادا ہونی ہیں، اس سے پہلے ان کے جسد خاکی کو عوام کے آخری دیدار کے لئے آشرم میں رکھاگیا ۔ایسی امید کی جا رہی ہے کہ ملک کے کئی قدآور سیاسی رہنما ان کی آخری رسومات میں شریک ہونے کے لئے آشرم جائیں گے جس کی وجہ سے وہاں پر حفاظتی انتظامات بڑھا دیئے گئے ہیں۔

بھیو جی مہاراج کی خود کشی کی وجہ تناؤ بتائی جا رہی ہے ۔ پولس نے سوسائڈ نوٹ برآمد کرنے کے ساتھ ان کی پستول بھی ضبط کر لی ہے ۔ مدھیہ پردیش کے وزیر اعلی شیو راج سنگھ چوہان کے ساتھ کئی سیاسی رہنماؤں نے ان کی موت پر افسوس کا اظہار کیا ہے لیکن کانگریس نے ان کی خودکشی معاملہ پر سی بی آئی جانچ کا مطالبہ کیا ہے۔