کرناٹک اسمبلی انتخابات کی تاریخوں کا آج کیا جائے گا اعلان، 11:30 بجے الیکشن کمیشن کی پریس کانفرنس

نئی دہلی: کرناٹک میں اسمبلی انتخابات کی تاریخوں کا اعلان آج ہونے جا رہا ہے۔ الیکشن کمیشن صبح ساڑھے 11 بجے پریس کانفرنس کر کے انتخابی تاریخوں کا اعلان کرے گا۔ خیال رہے کہ ریاستی اسمبلی کی مدت کار 24 مئی کو ختم ہونے جا رہی ہے۔

کرناٹک میں آخری بار مئی 2018 میں اسمبلی انتخابات ہوئے تھے۔ ریاست میں اسمبلی کی 224 سیٹیں ہیں اور گزشتہ اسمبلی انتخابات میں بی جے پی نے 104 سیٹیں جیتی تھیں۔ جبکہ، کانگریس کو 80 سیٹیں حاصل ہوئی تھیں۔ جے ڈی ایس نے 37 سیٹیں جیتی تھیں اور کسی جماعت کو اکثریت حاصل نہیں ہوئی تھی۔

سابقہ انتخابات کے بعد کانگریس اور جے ڈی ایس نے مخلوط حکومت قائم کی تھی اور جے ڈی ایس لیڈر کماراسوامی وزیر اعلیٰ بنے تھے۔ تاہم، یہ مخلوط حکومت تقریباً 14 ماہ بعد گر گئی تھی اور بی جے پی پر حکومت گرانے کا الزام عائد ہوا۔ بی جے پی نے کانگریس چھوڑنے والے ایم ایل اے کے ساتھ بی ایس یدی یورپا کی قیادت میں حکومت بنائی۔ یدی یورپا نے دو سال بعد وزیراعلیٰ کے عہدے سے استعفیٰ دے دیا اور اس کے بعد بسواراج بومئی ریاست کے وزیراعلیٰ بنے۔

اس وقت ریاست میں اسمبلی انتخابات کی تیاریاں زوروں پر ہیں۔ ابھی کچھ دن پہلے کانگریس پارٹی نے اسمبلی انتخابات کے لیے اپنے 124 امیدواروں کی پہلی فہرست جاری کی تھی۔ اس فہرست میں سابق وزیر اعلیٰ سدارمیا اور کرناٹک کانگریس کے صدر ڈی کے شیوکمار کے نام بھی شامل تھے۔ سابق وزیر اعلیٰ سدارامیا ورونا اسمبلی سیٹ سے الیکشن لڑیں گے۔ جبکہ، کرناٹک پردیش کانگریس کے صدر ڈی کے شیوکمار کو کنک پورہ سے میدان میں اتارا گیا ہے۔