سری لنکا میں تباہی مچانے کے بعد سمندری طوفان’ دتوا‘ آج ہندوستان پہنچے گا

سری لنکا میں تباہی مچانے کے بعد سمندری طوفان ’دتوا ‘ہندوستان کے جنوبی ساحل کی جانب بڑھ رہا ہے۔ اس کی وجہ سے ہفتہ کو تمل ناڈو کے کئی حصوں میں شدید بارش ہوئی۔ رامناتھ پورم اور ناگاپٹنم اضلاع سب سے زیادہ متاثر ہوئے۔ ہندوستان کے محکمہ موسمیات (آئی ایم ڈی) کے مطابق طوفان ’دتوا‘ اتوار کو ہندوستان کے جنوبی ساحل تک پہنچے گا۔ تمل ناڈو اور آندھرا پردیش حکومتوں نے کہا ہے کہ وہ کسی بھی صورت حال سے نمٹنے کے لیے پوری طرح تیار ہیں۔

آئی ایم ڈی نے ایک بیان میں کہا، "سائیکلون ’دتوا‘ سری لنکا اور اس سے ملحقہ جنوب مغربی خلیج بنگال کے اوپر گزشتہ چھ گھنٹوں کے دوران 8 کلومیٹر فی گھنٹہ کی رفتار سے شمال-شمال مغرب کی طرف بڑھا اور توقع ہے کہ یہ 30 نومبر کی صبح تک ہندوستان کے جنوبی ساحل تک پہنچ جائے گا۔ آندھرا پردیش، تامل ناڈو، اور پڈوچیری سب سے زیادہ متاثرہ ریاستیں ہوں گی۔‘‘

طوفان ’دتوا‘کی وجہ سے ہونے والی موسلادھار بارش سے تمل ناڈو میں فضائی خدمات متاثر ہوئی ہیں۔ چنئی ایئرپورٹ نے ایک بیان میں کہا کہ خراب موسم کی وجہ سے ہفتہ کو 54 پروازیں منسوخ کر دی گئیں۔ ایئر انڈیا سمیت کئی ایئر لائنز نے کہا ہے کہ چنئی اور تمل ناڈو کے کچھ دوسرے شہروں سے ان کی پروازیں طوفان سے متاثر ہو سکتی ہیں۔

طوفان’ دتوا‘ نے تمل ناڈو میں ریل خدمات کو بھی متاثر کیا ہے، جس کی وجہ سے سدرن ریلوے  یعنی جنوبی ریلوے نے اپنی ٹرین کے ٹائم ٹیبل میں کچھ تبدیلیوں کا اعلان کیا ہے۔طوفان’ دتوا ‘نے سری لنکا میں بڑے پیمانے پر تباہی مچا ئی ہے۔ طوفان سے متعلقہ واقعات میں مرنے والوں کی تعداد 132 ہو گئی ہے جب کہ 171 افراد لاپتہ ہیں۔ اس صورتحال نے حکومت کو جزیرے کے ملک بھر میں ہنگامی حالت کا اعلان کرنے پر اکسایا ہے۔ اس مشکل صورتحال کے جواب میں ہندوستان اپنے قریبی اتحادی سری لنکا کی مدد کے لیے سامنے آیا ہے، آپریشن ساگر بندھو شروع کیا ہے۔