خلیج بنگال میں تیار ہو رہا گردابی طوفان ’گلاب‘، اڈیشہ اور آندھرا ہوگا سب سے زیادہ متاثر

کچھ مہینوں قبل یاس طوفان نے ملک کے ساحلی حصوں میں خوب تباہی مچائی تھی، اور اب خلیج بنگال میں ایک اور طوفان تیار ہو رہا ہے۔ اس طوفان کا نام ’گلاب‘ ہے، اور یہ نام پاکستان نے دیا ہے۔ مشرق وسط بنگال کی خلیج سے یہ طوفان شمال مغرب کی جانب بڑھ رہا ہے۔ فی الحال یہ طوفان ڈپریشن کی شکل میں ہے۔

شمال مغرب بنگال کی خلیج میں یہ ڈپریشن آج دیر شام تک گردابی طوفان کی شکل اختیار کر لے گا جس کے آندھرا پردیش اور اڈیشہ سے ٹکرانے کے آثار ہیں۔ یہ گردابی طوفان جنوبی اڈیشہ اور شمالی آندھرا پردیش سے ٹکرا سکتا ہے۔ محکمہ موسمیات کے اندازے کے مطابق اس کا سب سے زیادہ اثر اڈیشہ کے گوپال پور سے آندھرا پردیش کے وشاکھاپٹنم کے درمیان ہوگا۔ گردابی طوفان ’گلاب‘ کا لینڈ فال آندھرا پردیش کے کلنگ پٹنم میں ہو سکتا ہے۔

دوسری طرف مغربی بنگال پر بھی طوفان کا اثر پڑنے کا امکان ہے۔ یہاں ہفتہ کے روز سے بارش کا امکان ہے۔ مشرقی مدناپور اور جنوب 24 پرگنہ میں سب سے زیادہ بارش کا امکان ظاہر کیا گیا ہے۔ محکمہ موسمیات کے مطابق اتوار کو ہلکی بارش ہوگی اور پیر کو جنوبی بنگال میں تیز بارش کا امکان ہے۔ طوفان کا سب سے زیادہ اثر شمال و جنوب 24 پرگنہ، جھاڑگرام کے ساتھ مشرقی اور مغربی مدناپور ضلعوں میں پڑ سکتا ہے۔

اس کے ساتھ ہی خلیج بنگال میں ایک اور ڈپریشن کے تیار ہونے کے آثار ہیں جو بنگال اور بنگلہ دیش سے ملحق علاقوں کو متاثر کرے گا۔ اس کے سبب منگل کو بارش کی تیزی بڑھے گی۔ کولکاتا سمیت جنوبی بنگال کے کئی اضلاع میں زوردار بارش ہو سکتی ہے۔