شوہر محمد شامی کے گھر میں جبراً داخل ہوئیں حسین جہاں، پولس نے کیا گرفتار

ہندوستانی ٹیم کے تیز گیندباز محمد شامی اور ان کی بیوی حسین جہاں کے درمیان الزامات در الزامات کا سلسلہ اب بھی جاری ہے۔ اس درمیان امروہہ پولس نے بدامنی پھیلانے کےا لزام میں حسین جہاں کو گرفتار کر لیا ہے۔ دفعہ 151 میں چالان کرنے کے بعد حسین جہاں کو ایس ڈی ایم کورٹ لے جایا گیا ہے۔ دراصل حسین جہاں اتوار کی شام اچانک اپنی سسرال امروہہ پہنچ گئیں تھیں۔ ان کے ساتھ ان کی بیٹی اور ملازمہ بھی موجود تھی۔ جیسے وہ سبھی گھر میں داخل ہوئے وہاں موجود ان کی ساس اور دیور کے ساتھ ان کا جھگڑا ہو گیا۔ محمد شامی کے گھر والوں نے حسین جہاں کو روکنے کی کوشش کی لیکن حسین جہاں زبردستی گھر میں گھس گئیں۔ ہنگامہ بڑھنے کے بعد گھر کے باہرپڑوسیوں کی بھیڑ جمع ہو گئی۔

ہنگامے کی اطلاع کے بعد ڈڈولی پولس موقع پر پہنچی اور دونوں فریقین میں سمجھوتے کی بات کہی۔ لیکن دونوں فریقین میں سمجھوتہ کی کوئی گنجائش نہ دیکھ کر پولس حسین جہاں کو اپنے ساتھ لے گئی۔ شامی کی ماں نے الزام عائد کیا کہ حسین جہاں زبردستی گھر میں گھس گئی ہے جو کہ قانون کے خلاف ہے۔ شامی کے گھر والوں نے حسین سے دو ٹوک لفظوں میں کہہ دیا کہ گاؤں کے گھر سے ان کا کوئی تعلق نہیں رہا ہے۔ ان کا ٹھکانہ شامی کے مراد آباد کے نئے گھر میں ہے، وہ وہیں جائیں۔ اس بات پر معاملہ سلجھانے پہنچی خاتون ایس او کو حسین جہاں نے دو ٹوک جواب دیا۔ انھوں نے کہا کہ وہ اپنے شوہر کے گھر آئی ہے، یہ میرا اور میرے شوہر کا گھر ہے۔ میں یہیں پر رہوں گی۔

اس پورے معاملے میں پیر کی صبح ڈرامے میں نیا موڑ آیا جب حسین جہاں نے میڈیا کے سامنے امروہہ پولس پر سنگین الزام لگائے۔ انھوں نے کہا کہ ’’پولس اسے بغیر کسی جرم کے زبردستی لے کر آئی ہے۔ اتوار کی رات سے انھیں اور ان کی بیٹی کو ابھی تک کھانے کے لیے کچھ نہیں دیا گیا ہے۔ اس کے سبب اس کی بیٹی بھوک سے رو رہی ہے۔‘‘

حسین جہاں نے امروہہ پولس پر یہ بھی الزام عائد کیا کہ محمد شامی کی اونچی پہنچ اور پیسے کی وجہ سے پولس اسے پریشان کر رہی ہے۔ انھوں نے مزید کہا کہ ’’کیا حکومت یہ نہیں دیکھ رہی ہے؟ حکومت بیٹی بچاؤ، بیٹی پڑھاؤ کی بات کرتی ہے اور میں بھی ایک بیٹی ہوں۔ میرے ساتھ کیسا برتاؤ کیا جا رہا ہے۔‘‘

قابل ذکر ہے کہ کرکٹر محمد شامی کا اپنی بیوی حسین جہاں سے گزشتہ ایک سال سے تنازعہ چل رہا ہے۔ اس معاملے میں اکثر دونوں جانب سے الزامات در الزامات کا سلسلہ شروع ہو جاتا ہے۔ اس سے پہلے حسین جہاں نے محمد شامی پر میچ فکسنگ اور گھریلو تشدد جیسے الزامات عائد کیے تھے۔ حالانکہ شامی کو دونوں ہی معاملوں میں کلین چٹ مل گئی تھی اور ورلڈ کپ 2019 کی ٹیم میں بھی وہ شامل ہیں۔