ایودھیا میں کورونا وائرس کو شکست دینے سڑک پر نکلے ’یمراج‘، تصویر وائرل

کورونا وائرس کے خلاف لڑائی کے لیے ہر ذمہ دار شخص اپنی اپنی طرف سے پوری کوشش کر رہا ہے اور ڈاکٹروں کے ساتھ ساتھ پولس انتظامیہ اس بات کو یقینی بنانے لگی ہوئی ہے کہ کورونا کا پھیلاؤ کسی طرح روکا جائے۔ اس درمیان لوگوں میں لگاتار بیداری بھی پھیلائی جا رہی ہے تاکہ وہ لاک ڈاؤن کی خلاف ورزی نہ کریں اور سوشل ڈسٹنسنگ (سماجی فاصلہ) کا خیال رکھیں۔

اس درمیان ایودھیا سے ایک دلچسپ تصویر سامنے آئی ہے جہاں سڑک پر 'یمراج' جیسا حلیہ بنا کر کچھ پولس والے اپنی ڈیوٹی کر رہے ہیں۔ بتایا جاتا ہے کہ جمعہ کے روز ایودھیا کی سڑکوں پر کورونا کی شکل سے ملتے جلتے 'یمراج' نے ہاتھ میں تلوار بھانجتے ہوئے لوگوں کو متنبہ کیا کہ "اگر آپ گھروں سے باہر نکلے تو ہم نہیں چھوڑیں گے۔" پولس کا یہ انداز لوگوں کو کافی پسند آ رہا ہے۔

بتایا جاتا ہے کہ معاملہ ایودھیا ضلع کے کمار گنج قصبہ کا ہے جہاں لاک ڈاؤن پر عمل کرانے کے لیے مارچ کر رہی پولس نے لوگوں میں بیداری پیدا کرنے کے مقصد سے کورونا کی شکل سے ملتے جلتے یمراج کا حلیہ بنایا اور پھر سڑک پر نکل پڑے۔ اس یمراج کے ساتھ کئی پولس والے وردی میں بھی نظر آئے۔ باقاعدہ ڈی جے اور کثیر تعداد میں پولس فورس کے ساتھ نکلے پولس افسران نے پورے قصبے کا دورہ کیا اور 'کورونا یمراج' کے ذریعہ لوگوں میں یہ پیغام پہنچانے کی کوشش کی کہ سب گھروں میں رہیں اسی میں ان کی بھلائی ہے۔

ہندی نیوز پورٹل 'نیوز18' پر شائع ایک رپورٹ کے مطابق پولس نے ایک جھانکی نکالی تھی جس میں کورونا یمراج کے کردار میں تھا۔ کورونا یعنی یمراج لوگوں سے اپیل کر رہا تھا کہ "اگر آپ گھروں سے باہر نکلے تو ہم نہیں چھوڑیں گے۔ ہم صرف گھر کے باہر گھوم رہے لوگوں کو ہی اپنا نشانہ بناتے ہیں۔ جو لوگ لاک ڈاؤن کے دوران اپنے گھروں میں رہ رہے ہیں ان کو ہم سے کوئی خطرہ نہیں ہے۔" اس جھانکی کے ذریعہ لوگوں سے سوشل ڈسٹنسنگ پر عمل کرنے، ماسک کے استعمال کرنے اور صاف صفائی کا خیال رکھنے کی اپیل کی گئی۔