کانگریس نے منیش شرما کو سونپی یوتھ کانگریس انچارج کی ذمہ داری، کرشنا الاورو بہار پر دیں گے توجہ

کانگریس نے بہار اسمبلی انتخاب کے دوران ہی کرشنا الاورو کو یوتھ کانگریس انچارج کے عہدہ سے ہٹا دیا ہے۔ ان کی جگہ منیش شرما کو انڈین یوتھ کانگریس کا انچارج مقرر کیا گیا ہے۔ کرشنا الاورو اب صرف بہار انچارج کی ہی ذمہ داری سنبھالیں گے۔ وہ گزشتہ کچھ ماہ سے دوہری ذمہ داری سنبھال رہے تھے۔ کانگریس نے جمعرات کی شام ایک پریس ریلیز جاری کر اس حوالے سے جانکاری دی ہے۔

کانگریس کی جانب سے جاری پریس ریلیز میں بتایا گیا ہے کہ کانگریس صدر ملکارجن کھڑگے نے منیش شرما کو انڈین یوتھ کانگریس کا نیا انچارج بنانے کی منظوری دے دی ہے۔ بہار اسمبلی انتخاب کے درمیان کانگریس پارٹی میں یہ تبدیلی کیا اثر ڈالے گا، یہ توآنے والا وقت ہی بتائے گا۔ رپورٹ کے مطابق کرشنا الاورو فی الحال صرف بہار کے انچارج کی ذمہ داری سنبھالیں گے۔ بہار انتخاب کے بعد انہیں دوسری ذمہ داری دی جا سکتی ہے۔

انڈین یوتھ کانگریس کے نو منتخب انچارج منیش شرما پارٹی کی ’وہائٹ ٹی شرٹ موومنٹ‘ کی ذمہ داری سنبھال رہے ہیں۔ بتایا جا رہا ہے کہ یہ تحریک نیشنل کانگریس کے ذریعہ تیار کردہ ایک ایسا پلیٹ فارم ہے، جس کا مقصد سماجی انصاف اور آئینی اقدار کے لیے پرعزم نوجوانوں اور کارکنان کو منظم کرنا تھا اور انہیں قیادت کے لیے تیار کرنا ہے۔ حالانکہ نئی ذمہ داری ملنے کے بعد منیش شرما نے کسی بھی طرح کا کوئی بیان نہیں دیا ہے۔

قابل ذکر ہے کہ کانگریس کے اعلیٰ کمان کے مذکورہ فیصلے سے بہار اسمبلی انتخاب میں پارٹی کو مزید تقویت ملنے کی امید ہے۔ کرشنا الاورو ایک ساتھ انڈین یوتھ کانگریس اور بہار کانگریس انچارج کی دوہری ذمہ داری سنبھال رہے تھے۔ ان کے کام کے بوجھ کو کم کرنے کے لیے ہی کانگریس نے یہ فیصلہ لیا ہے، تاکہ کرشنا الاورو کی پوری توجہ بہار اسمبلی انتخاب پر ہی ہو۔ یہی وجہ ہے کہ ان کی جگہ منیش شرما کو انڈین یوتھ کانگریس کی ذمہ داری سونپی گئی ہے۔