مودی کا ریموٹ کنٹرول والا بیان کھڑگے کی توہین: کانگریس

کانگریس نے کہا ہے کہ ملکارجن کھڑگے کے لیے وزیر اعظم نریندر مودی کا ریموٹ کنٹرول والا بیان نہ صرف مسٹر کھڑگے بلکہ اس طبقے کی بھی توہین ہے جس سے مسٹر کھڑگے تعلق رکھتے ہیں۔ کانگریس کے جنرل سکریٹری کے سی وینوگوپال نے ایک بیان میں کہا کہ مسٹر مودی کا بیان سیاسی نہیں ہے بلکہ اس طبقہ کے لوگوں پر حملہ ہے جس سے مسٹر کھڑگے کا تعلق ہے۔ مسٹر مودی کا یہ بیان اس برادری کی توہین ہے جس سے مسٹر کھڑگے تعلق رکھتے ہیں۔

انہوں نے کہا، "وزیر اعظم مودی نے وطن کے بیٹے، ہماری پارٹی کے رہنما  مسٹر کھڑگے کی توہین کی ہے۔ یہ ہلکا پھلکا سیاسی بیان نہیں ہے بلکہ ان لوگوں پر براہ راست اور سخت حملہ ہے جو معاشرے کے مظلوم پس منظر سے تعلق رکھتے ہیں لیکن عوامی زندگی میں کامیابی کا بڑا ہدف حاصل کر چکے ہیں۔

مسٹر وینوگوپال نے کہا، "حقیقت میں، مسٹر مودی اپنی پارٹی کے سماجی انصاف کے جھوٹے دعووں کے برعکس اس بات کو ہضم نہیں کر پا رہے ہیں، یہ کانگریس ہی ہے جو جمہوری طریقے سے اتنے قدرآور لیڈر کو اعلیٰ عہدے تک پہنچانے کی صلاحیت رکھتی ہے۔ "مسٹر کھڑگے کا چھ دہائیوں کا سیاسی سفر ہندوستان کی تاریخ میں بے مثال ہے اور لاکھوں لوگوں کے لیے تحریک کا باعث ہے۔"

واضح رہے کہ مسٹر مودی نے ایک انتخابی ریلی میں کہا کہ اب تک کہا جاتا تھا کہ وزیر اعظم ریموٹ کنٹرول سے کام کرتے تھے لیکن اب ہم دیکھ رہے ہیں کہ مسٹر کھڑگے بھی ریموٹ کنٹرول سے کام کرتے ہیں"۔