کانگریس کا ’رن فار امبیڈکر، رن فار کانسٹی ٹیوشن‘ میراتھن کا اعلان، راہل گاندھی کریں گے آغاز

نئی دہلی میں کانگریس دفتر میں منعقدہ ایک پریس بریفنگ کے دوران پارٹی کے رہنماؤں نے اپریل کے مہینے کو ’سماجی انصاف ماہ‘ کے طور پر منانے کا اعلان کیا اور اس سلسلے میں متعدد پروگراموں کی تفصیلات پیش کیں۔ اس موقع پر بتایا گیا کہ اپریل کا مہینہ ہندوستان کی سماجی و فکری تاریخ کے لیے غیر معمولی اہمیت رکھتا ہے، کیونکہ اسی مہینے میں کئی عظیم شخصیات نے جنم لیا، جن میں جیوتی با راؤ پھولے، ڈاکٹر بھیم راؤ امبیڈکر، راہل سانکرتیاین، بابو جگجیون رام اور سمراٹ اشوک شامل ہیں۔

پریس کانفرنس کے دوران کانگریس کے ایس سی شعبہ کے چیئرمین راجیندر پال گوتم نے کہا کہ آل انڈیا کانگریس کمیٹی کے ایس سی اور او بی سی شعبے مشترکہ طور پر 11 اپریل کو لکھنؤ کے اندرا گاندھی پرتشٹھان میں جیوتی با راؤ پھولے کی جینتی بڑے پیمانے پر منائیں گے۔ اس کے بعد 12 اپریل کو صبح 6 بجے دہلی کے منڈی ہاؤس سے ایک بڑی سماجی تبدیلی میراتھن کا انعقاد کیا جائے گا، جسے ’رن فار امبیڈکر، رن فار کانسٹی ٹیوشن‘ کا نام دیا گیا ہے۔

انہوں نے بتایا کہ یہ میراتھن محض ایک کھیل سرگرمی نہیں بلکہ ایک علامتی اقدام ہے، جس کا مقصد ہندوستان کے آئین کی اہمیت کو اجاگر کرنا اور ان طبقات کو یاد کرنا ہے جنہیں آئین کے ذریعے برابری اور حقوق حاصل ہوئے۔ انہوں نے کہا کہ ڈاکٹر امبیڈکر کے مرتب کردہ آئین نے خواتین، دلتوں، آدی واسیوں اور پسماندہ طبقات کو صدیوں کی محرومی اور ناانصافی سے نکال کر مساوی مواقع فراہم کیے۔

اس موقع پر بتایا گیا کہ ابتدا میں میراتھن کے لیے انڈیا گیٹ سے 26، علی پور روڈ تک اجازت طلب کی گئی تھی، تاہم امتحانات کے پیش نظر دہلی پولیس کی درخواست پر مقام تبدیل کر کے منڈی ہاؤس کر دیا گیا ہے۔ شرکاء صبح 5:30 بجے منڈی ہاؤس پر جمع ہوں گے، جہاں سے میراتھن کا آغاز کیا جائے گا۔

راجیندر پال کے مطابق اس میراتھن کا افتتاح لوک سبھا میں قائد حزب اختلاف راہل گاندھی کریں گے، جبکہ ہندوستانی کرکٹ ٹیم کے سابق کپتان محمد اظہرالدین سمیت کئی اہم سیاسی و سماجی شخصیات بھی اس میں شرکت کریں گی۔ اب تک تقریباً 7 ہزار افراد اس میراتھن کے لیے رجسٹریشن کرا چکے ہیں، جبکہ مجموعی طور پر 15 ہزار افراد کی شرکت کی توقع ظاہر کی جا رہی ہے۔

پریس بریفنگ میں انعامات کا بھی اعلان کیا گیا، جس کے تحت پہلے نمبر پر آنے والے کو 50 ہزار روپے، دوسرے کو 25 ہزار اور تیسرے کو 15 ہزار روپے دیے جائیں گے، جبکہ دیگر نمایاں شرکاء کو بھی انعامات سے نوازا جائے گا۔ تمام شرکاء کو سرٹیفکیٹ، میڈل اور خصوصی ٹی شرٹ بھی فراہم کی جائے گی۔

انہوں نے اس بات پر زور دیا کہ میراتھن مکمل طور پر پرامن اور منظم انداز میں منعقد کی جائے گی، جس میں طبی سہولیات، پانی اور دیگر ضروری انتظامات کو یقینی بنایا گیا ہے۔ انہوں نے میڈیا اور عوام سے اپیل کی کہ وہ اس ’سماجی انصاف کی دوڑ‘ میں بڑھ چڑھ کر حصہ لیں اور آئین کے تحفظ اور برابری کے پیغام کو عام کریں۔