اتر پردیش کے بہرائچ میں چینی شہری گرفتار، فون سے کئی حساس تصاویر برآمد

 مسلح سرحدی فورس (ایس ایس بی) نے اترپردیش کے بہرائچ ضلع میں ہند۔ نیپال سرحد پر روپیڈیہا چیک پوسٹ پر ایک 49 سالہ چینی شہری کو گرفتار کیا ہے۔ ایک ایجنسی کے مطابق ایس ایس بی افسران نے بتایا کہ وہ غیر قانونی طریقے سے ہندوستان میں داخل ہوا تھا اور سرحدی علاقے کی ویڈیو گرافی کررہا تھا۔

افسران نے بتایا کہ گرفتار کیا گیا چینی شہری پاکستان جاچکا ہے اور اس کے پاس سے پاکستانی، چینی اور نیپالی کرنسی برآمد کی گئی ہے۔ ایس ایس بی کی 42 ویں بٹالین کے کمانڈینٹ گنگا سنگھ اُداوت نے بتایا کہ چینی شہری کو گرفتار کرنے والے افسر نے انہیں بتایا کہ نیپپال سے ہندوستان میں گھسنے کے بعد وہ ایک حساس بارڈر علاقے کی ویڈیو گرافی کررہا تھا۔

افسر نے مزید بتایا کہ گرفتار کئے گئے چینی شہری کی شناخت چین کے ہونان صوبہ کے رہنے والے لیوکوجنگ کے طورپر ہوئی ہے۔ اس کے پاس مبینہ طور پرہندوستان میں گھسنے کے لئے مجاز دستاویزات نہیں تھے۔ اس کے ساتھ ہی اس کے پاس سے تین موبائل فون بھی ضبط کئے گئے ہیں اور ان میں سے ایک موبائل میں ہندوستانی علاقے میں کئی حساس مقامات کی ویڈیو بھی تھیں۔

گرفتارچینی شہری کے پاس سے نیپال کا ایک روڈ میپ بھی ملا ہے۔ میپ پر سب کچھ انگریزی میں لکھا تھا لیکن کوجنگ نے اشاروں سے بتایا کہ اسے نہ تو ہندی آتی ہے اور نہ ہی انگریزی میں وہ بات کرسکتا ہے۔ ایس ایس بی پولیس اور دوسری سیکورٹی ایجنسیوں نے ایک انٹرسیپٹ کی مدد سے کوجنگ سے پوچھ گچھ کی۔ کمانڈینٹ نے بتایا کہ پوچھ گچھ میں پتہ چلا ہے کہ چینی شہری پاکستان بھی گیا تھا۔ حالانکہ اس کے پاس اس ملک کا ویزا تھا۔

کمانڈینٹ نے کہا کہ پاکستان کا سفر،بغیر مجاز دستاویزات کے ہندوستان میں داخلہ، حساس مقامات کی ویڈیو گرافی اور پوچھ گچھ کے دوران انگریزی کی ’معلومات نہ ہونے‘ کی وجہ سے اسے ’سسپیکٹ‘ مانا جارہا ہے جبکہ برآمد میپ انگریزی میں تھا۔ اُداوت نے بتایا کہ پکڑے گئے چینی شہری کو پولیس کو سونپ دیا گیا ہے۔ پولیس نے روپیڈیہا تھانے میں فارنرس ایکٹ کی دفعات کے تحت معاملہ درج کرکے اس کو گرفتار کر لیا ہے۔

سیکورٹی ایجنسیوں کی ابتدائی جانچ میں پتہ چلا ہے کہ وہ 15 نومبر کو نیپالی ٹورسٹ ویزا پر چین سے نیپال آیا تھا۔ 22 نومبر کو نیپال گنج (روپیڈیہا سے متصل نیپال کا ایک شہر) پہنچنے کے بعد وہ 24 نومبر کو روپیڈیہا بارڈر کے راستے غیر قانونی طریقے سے ہندوستان میں گھس آیا۔