نئے ٹیکس نظام پر چدمبرم نے پھر اٹھائے سوال، کہا- اخبارات میں شائع ہونے والے تجزیہ سے کھل رہے ہیں راز

پی چدمبرم نے کہا کہ انہیں افسوس ہے کہ او ٹی آر اور این ٹی آر کے اس ہو ہلّا میں ایک ترقی پذیر ملک میں انفرادی بچت کی اہمیت کو فراموش کر دیا گیا ہے۔

پی چدمبرم، تصویر آئی اے این ایس
پی چدمبرم، تصویر آئی اے این ایس
user

قومی آوازبیورو

سابق مرکزی وزیر اور کانگریس کے سینئر لیڈر پی چدمبرم نے ایک بار پھر مرکزی حکومت کے ذریعہ بجٹ میں پیش کیے گئے نئے ٹیکس نظام پر سوال اٹھائے ہیں۔ انہوں نے کہا کہ نئے ٹیکس سسٹم کے راز معروف اخبارات میں شائع ہونے والے تجزیوں اور رپورٹس سے کھل رہے ہیں جو سب کے سامنے آ رہا ہے۔

پی چدمبرم نے کہا کہ ریاست کی طرف سے فراہم کردہ حفاظتی جال کی عدم موجودگی میں زیادہ تر لوگوں کے لیے ذاتی بچت ہی واحد سماجی تحفظ ہے۔ انہوں نے کہا کہ مجھے افسوس ہے کہ او ٹی آر اور این ٹی آر کے اس ہو ہلّا میں ایک ترقی پذیر ملک میں ذاتی بچت کی اہمیت کو فراموش کر دیا گیا ہے۔


اس سے قبل بدھ کو بجٹ پیش ہونے کے بعد پی چدمبرم نے پریس سے خطاب کیا تھا۔ اس دوران انہوں نے نئے ٹیکس نظام کے حوالے سے کئی سوالات اٹھائے تھے۔ انہوں نے کہا تھا کہ صرف نئے ٹیکس نظام کا انتخاب کرنے والوں کو ہی فائدہ ملے گا، لیکن یہ نہیں بتایا کہ پرانے ٹیکس نظام کا انتخاب کرنے والوں کے ساتھ کیا ہوگا۔ انہوں نے کہا کہ نئے ٹیکس نظام کو ڈیفالٹ بنانا عام لوگوں کے ساتھ ناانصافی ہے، کیونکہ اس سے عام ٹیکس دہندہ اس معمولی سماجی تحفظ سے محروم ہو جائے گا جو اسے پرانے ٹیکس نظام کے تحت مل سکتا تھا۔

بجٹ پر سوال اٹھاتے ہوئے چدمبرم نے کہا کہ بالواسطہ ٹیکس میں کوئی کمی نہیں کی گئی ہے۔ خاص طور پر انتہائی غیر معقول جی ایس ٹی کی شرحوں میں کوئی کمی نہیں کی گئی ہے۔ پٹرول، ڈیزل، سیمنٹ، کھاد وغیرہ کی قیمتوں میں کوئی کمی نہیں کی گئی۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔