سوشانت کی موت پرتفتیش جاری، ابھی کسی بھی امکان سے انکار نہیں کیا گیا: سی بی آئی

بالی وڈ ادارکار سوشانت سنگھ راجپوت کی موت کے معاملے کی جانچ کرنے والی ایجنسی مرکزی تفتیشی بیورو (سی بی آئی) نے کہا ہے کہ سوشانت کی موت سے متعلق تمام پہلوؤں اور فریقوں کی تحقیقات کی جارہی ہے اور ابھی تک کسی بھی طرح کے امکان سے انکار نہیں کیا گیا ہے۔

سی بی آئی نے پیر کی دیر رات ایک بیان جاری کرکے اس کی وضاحت کی۔ بیان کے مطابق تفتیشی ایجنسی پیشہ ورانہ طور پر سوشانت سنگھ راجپوت کی موت سے متعلق تمام پہلوؤں کی تحقیقات کر رہی ہے اور اس معاملے میں ابھی تفتیش جاری ہے۔

سی بی آئی نے بیان میں کہا ہے کہ "مرکزی تفتیشی بیورو پیشہ ورانہ طور پر سوشانت سنگھ راجپوت کے قتل سے متعلق تمام پہلوؤں کی تحقیقات کر رہا ہے اور ابھی تک کسی بھی امکان سے انکار نہيں کیا گيا ہے۔ اس معاملے میں ابھی تفتیش جاری ہے"۔

سشانت سنگھ کے پیسے کا غلط استعمال ہونے کی بات سامنے آنے کے بعد انفورسمنٹ ڈائریکٹورٹ (ای ڈی) بھی اس معاملے کی تحقیقات کر رہی ہے۔ سشانت کی موت کے معاملے میں منشیات کے کردار کی بات سامنے آنے کے بعد اس معاملے میں ایک نیا موڑ آگیا اور اس کے بعد این سی بی نے منشیات کے پہلوؤں کی جانچ شروع کر دی ۔ این سی بی نے اب تک اس معاملے میں آٹھ افراد کو گرفتار کیا ہے۔ ریا چکرورتی کے بھائی شووک اور سشانت کے گھر کے منیجر سیموئیل مرانڈا کو پہلے ہی گرفتار کیا جاچکا ہے۔

این سی بی نے جس طرح فلمی اداکاروؤں سے پوچھ تاچھ کی اور اس کا جس طرح سے میڈیا میں کوریج ہوا اور ہو رہا ہے اس پر کئی جانب سے سوال اٹھائے جا رہے ہیں اور اس تعلق سے کچھ لوگوں کا کہنا ہے کہ اب تو اس معاملہ میں فیشن پریڈ ہو رہی ہے۔