سنت کبیر نگر میں شادی سے واپس آرہی کار دردناک سڑک حادثے کی شکار، 3 نوجوانوں کی موقع پر ہی موت

اترپردیش میں ضلع سنت کبیر نگر کے مینہداول تھانہ علاقے میں ایک دردناک سڑک حادثے میں 3 نوجوانوں کی موت ہوگئی۔ بتایا جارہا ہے کہ یہ حادثہ اس وقت ہوا جب شادی کی تقریب سے واپس لوٹ رہے نوجوانوں کی کار بے قابو ہو کر سڑک کنارے الٹ گئی۔ بارات مٹیاری گورکھپورسے تلجا گئی تھی۔ شادی سے واپسی کے دوران ارٹیگا کارسڑک کنارے پڑی بجری پر پھسل کربے قابو ہوگئی اور قریب ہی واقع بجلی کے کھمبے سے ٹکرا گئی۔ ٹکر اتنی شدید تھی کہ کار زمین پر رگڑتے ہوئے ایک مکان کی دیوار میں گھس گئی۔

نیوزپورٹل ’اے بی پی‘ کی خبرکے مطابق اس بھیانک حادثے میں کارمیں سوار6 نوجوانوں میں سے 3 کی موقع پرہی موت ہو گئی جبکہ 3 دیگر بھی زخمی ہیں اوران کا علاج ضلع اسپتال میں کیا جا رہا ہے۔ ڈاکٹروں نے ان میں سے ایک کو تشویشناک حالت کے پیش نظرمیڈیکل کالج ریفر کردیا ہے۔ بتایا جا رہا ہے کہ کاراچانک توازن کھو بیٹھی جس کے بعد یہ حادثہ پیش آیا۔ پولیس نے فی الحال لاشوں کو پوسٹ مارٹم کے لیے بھیج کر آگے کی کارروائی شروع کردی ہے۔

خبروں کے مطابق مینہداول تھانہ علاقہ کے بڑھیا ٹھاٹھر کے رہنے والے سرویش پانڈے عرف پنٹو (23)، پنڈاری کلا کے رہنے والے درگیش گپتا (25) اور بشن پور کے رہنے والے شرون شرما (24) جمعہ کی شام اپنے ایک دوست کی شادی کے لیے نکلے تھے۔ اسی دوران ان کی گاڑی کو حادثہ پیش آیا۔ ٹکر اتنی شدید تھی کہ کار کی باڈی کا بایاں حصہ مکمل طور پر تباہ ہو گیا ہے۔ کار کے دونوں دروازے بھی اُکھڑ کر الگ ہوگئے ہیں۔ کار میں بائیں جانب بیٹھے سرویش، درگیش اور شرون نے موقع پر ہی دم توڑ دیا۔

حادثے کی اطلاع ملتے ہی مینہداول تھانے کے انچارج سریندر سنگھ پولیس ٹیم کے ساتھ جائے وقوعہ پر پہنچے۔ کار میں پھنسے تمام نوجوانوں کو باہر نکال کر پہلے سی ایچ سی مہنداوال لے جایا گیا، جہاں سے انہیں ضلع اسپتال ریفر کر دیا گیا۔ زخمیوں میں شیوم کو بی آر ڈی میڈیکل کالج گورکھپور ریفر کر دیا گیا ہے جب کہ اندرجیت یادواور ایک دیگر زخمی کو ڈسچارج کر دیا گیا ہے۔