جامعہ میں میڈیکل کالج کھولنے کا مطالبہ ،دہلی کے ساتھ مغربی اتر پردیش کو بھی فائدہ ہوگا

بہوجن سماج پارٹی (بی ایس پی) کے رہنما کنور دانش علی نے جامعہ ملیہ اسلامیہ میں میڈیکل کالج کھولنے کا مطالبہ کرتے ہوئے کہا ہے کہ اس سے جنوب مشرقی دہلی کے ساتھ ساتھ مغربی اتر پردیش کے عوام کو بھی فائدہ ہوگا۔

امروہہ سے رکن پارلیمنٹ مسٹر علی نے ضابطہ 193 کے تحت کووڈ-19 کی صورتحال پر بحث میں حصہ لیتے ہوئے آج کہا کہ جنوب مشرقی دہلی میں ایک بھی سرکاری اسپتال نہیں ہے اور یہ علاقہ مغربی اتر پردیش سے وابستہ ہے۔ انہوں نے کہا کہ جامعہ میں میڈیکل کالج کا مطالبہ بہت پرانا ہے اور اگر اسے پورا کیا جاتا ہے تو جنوب مشرقی دہلی کے ساتھ ساتھ مغربی اتر پردیش کے عوام کو فائدہ ہوگا۔

انہوں نے کہا کہ کورونا کی دوسری لہر کے دوران حکومت کی کوتاہیاں سب کے سامنے آگئیں۔ انہوں نے کہا کہ حکومت بڑے بڑے دعوے کر سکتی ہے لیکن کورونا وبا کے دوران اتر پردیش میں جس طرح کا منظر دیکھا گیا وہ پریشان کن ہے۔