مودی حکومت میں دلت طبقہ کے نام پر ڈرامہ بازی ہوئی: ماوتی

لکھنؤ میں بی ایس پی سپریمو مایاوتی نے اپنی رہائش پر پارٹی کے سینئر لیڈروں کے ساتھ میٹنگ کی۔ میٹنگ سے قبل انھوں نے بی جے پی حکومت پر جم کر حملہ کیا۔ انھوں نے کہا کہ مودی حکومت نے اپنے دور اقتدار میں دلتوں کے ساتھ صرف ڈرامہ بازی کرنے کا کام کیا ہے۔ وزیر اعظم مودی پر حملہ آور ہوتے ہوئے انھوں نے کہا کہ مودی بھلے ہی ’من کی بات‘ پروگرام میں بابا صاحب بھیم راؤ امبیڈکر کا تذکرہ کرتے ہوں لیکن ان کی ذہنیت بابا صاحب کے بالکل خلاف ہے۔ یہی وجہ ہے کہ بی جے پی-آر ایس ایس گزشتہ دہائیوں میں اقتدار سے باہر تھی۔

انھوں نے بی جے پی کی تنقید کرتے ہوئے کہا کہ راجیہ سبھا انتخابات میں بی ایس پی امیدوار بھیم راؤ امبیڈکر کو ہرانے کے لیے اضافی امیدوار کھڑا کرنا سب سے بڑی مثال ہے۔ سماجوادی پارٹی-بہوجن سماج پارٹی اپنے ذاتی مفادات کے لیے ایک ساتھ نہیں آئے ہیں بلکہ بی جے پی کی بدتر حکمرانی کے خلاف کھڑے ہوئے ہیں۔

انھوں نے مرکز کے ساتھ ساتھ ریاستی حکومت پر بھی دلتوں کو نظر انداز کرنے کا الزام عائد کیا۔ انھوں نے کہا کہ بی جے پی کے لوگ دلتوں پر مظالم اور ان کا استحصال کرتے ہیں۔ بی جے پی حکومت میں دلتوں کے حقوق کی صرف بات کی جاتی ہے لیکن حقیقت میں ان پر مظالم کیے جاتے ہیں۔