مدھیہ پردیش: بولیرو کنوئیں میں گرنے کا اندوہناک حادثہ، 4 سادھوؤں کی موت، 3 شدید زخمی

مدھیہ پردیش کے چھندواڑہ ضلع میں جمعہ کی دیر شام بڑا حادثہ ہوا۔ یہاں بیتول بالاجی پورم سے درشن کرکے لوٹ رہے 7 سادھوؤں کی بولیرو گاڑی کا اچانک ٹائر پھٹ گیا۔ گاڑی بے قابو ہو کر ٹیمنی گاؤں کے پاس سڑک کنارے بنے کچے کنوئیں میں جا گری۔ حادثے میں بولیرو میں سوار 7 سادھؤں میں 4 کی موت ہو گئی جبکہ دیگر 3 شدید طور پر زخمی ہو گئے۔

بتایا جاتا ہے کہ ٹائر پھٹنے اور گاڑی کے بے قابو ہوتے ہی تین سادھو مکھنجو گیری (27)، شیو پوجن گیری (60) اور ڈرائیور راکیش گیری (32) وقت رہتے کود کر اپنی جان بچانے میں کامیاب رہے۔ حالانکہ یہ تینوں سنگین طور سے زخمی ہو گئے اور فی الحال ضلع اسپتال چھندواڑا میں ان کا علاج چل رہا ہے۔

حادثے کے فوراً بعد پولیس، انتظامیہ اور ایس ڈی آر ایف کی ٹیم موقع پر پہنچی اور ریسکیو آپریشن شروع کیا۔ تین لاشوں کو فوراً نکال لیا گیا جبکہ چوتھی لاش کو دیر رات تک باہر لانے کی کوشش جاری رہی۔ تین مہلوکین کی پہچان ملکھان گیری (65)، راکیش گیری (35)، گردھاری اور گلاب گیری (40) کے طور پر ہوئی ہے۔ ڈی ایس پی آر پی چوبے نے بتایا کہ گاڑی کا ٹائر اچانک پھٹا اور گاڑی سیدھے پانی سے بھرے کنوئیں میں جا گری۔

ضلع اسپتال کے ڈاکٹر وکاس سنگھ نے تصدیق کی کہ چار سادھوؤں کی موت ہو چکی ہے اور ان کی لاش مرچری بھیج دی گئی ہے۔ تین زخمی سادھوؤں کی حالت ابھی مستحکم ہے۔

حادثے میں زخمی شیو پوجن گیری نے بتایا کہ ٹائر پھٹنے کے بعد ڈرائیور نے سنبھالنے کی پوری کوشش لیکن گاڑی کنوئیں میں چلی گئی۔ انہوں نے کہا میں اور دو ساتھی باہر نکل آئے لیکن چار لوگ پانی میں ڈوب گئے۔ ان میں میرا بیٹا کلو گیری بھی شامل تھا جو باہر نہیں نکل پایا۔ حادثے کی خبر ملتے ہی چھندواڑہ ایم پی بنٹی وویک ساہو اسپتال پہنچے اور زخمیوں سے ملاقات کرکے بہتر علاج کا انتظام یقینی کرنے کی ہدایت دی۔