متھن چکرورتی کو ملاڈ میں غیر قانونی تعمیرات کے لیے بی ایم سی کا نوٹس، قانونی کارروائی کا انتباہ

بالی ووڈ اداکار اوربی جے پی رہنما متھن چکرورتی کو بی ایم سی کا نوٹس ملا ہے۔ ان پر الزام ہے کہ انہوں نے ممبئی کے ملاڈ علاقے کے ایرنگل گاؤں میں ایک پلاٹ پر بغیر اجازت گراؤنڈ فلور پر کچھ تعمیر کروایا ہے۔ اسی کو لے کر بی ایم سی نے انہیں وجہ بتاؤ نوٹس جاری کیا ہے۔ حالانکہ ابھی تک اداکار نے اس معاملے پر کوئی رد عمل ظاہر نہیں کیا ہے۔ مونسپل کارپوریشن کے افسروں کے مطابق متھن کو اب یہ بتانا ہوگا کہ تعمیر کو کیوں نہیں گرانا چاہیے۔

اگر متھن جواب نہیں دیتے اور اس کا جواز ثابت کرنے میں ناکام رہتے ہیں تو بی ایم سی کا کہنا ہے کہ وہ اسے منہدم کر دیں گے۔ اداکار کو ممکنہ قانونی کارروائی کی وارننگ بھی دی گئی ہے۔

بی ایم سی ذرائع کے مطابق ایرنگل گاؤں میں ہیرا دیوی مندر کے پاس جائزہ کے دوران دو ایک سے زیادہ میزینائن منزلہ عمارتیں، ایک گراؤنڈ فلور اسٹرکچر اور اینٹوں، لکڑی، کانچ اور اے سی شیٹ سے بنی تین عارضی تعمیرات پائے گئے۔ یہ ڈھانچے مجاز اتھاریٹی سے اجازت لیے بغیر علاقے میں بنائے گئے ہیں جس کے لیے اداکار متھن چکرورتی کو وجہ بتاؤ نوٹس جاری کیا گیا ہے۔

بی ایم سی نے ممبئی میونسپل کارپوریشن ضابطہ کی دفعہ 351 (1اے) کے تحت متھن کو نوٹس جاری کیا ہے جس میں انہیں 10 مئی سے ایک ہفتہ کے اندر جواب دینے کے لیے کہا گیا ہے۔

دراصل ممبئی کے مڈ علاقے میں غیر قانونی تعمیرات کو ہٹانے کے لیے بی ایم سی سخت رخ اختیار کر چکی ہے۔ بی ایم سی نے اس علاقے میں 100 سے زیادہ غیر قانونی تعمیرات پکڑے ہیں۔ ان میں سے کچھ ایسے بنگلے بھی شامل ہیں جو غلط نقشے کی بنیاد پر بنائے گئے ہیں۔ افسروں کا کہنا ہے کہ وہ مئی کے آخر تک ان سبھی غیر قانونی عمارتوں کو گرانے کی تیاری میں ہے۔ اس کا مطلب صاف ہے کہ ایک بار پھر بی ایم سی کا بلڈوزر کئی غیر قانونی تعمیرات کو نیست و نابود کر دے گا۔