کولکاتہ: شیاما پرساد کے نام پر سیاہی پوتی

کولکاتہ: پریڈنسی یونیورسٹی کے کیمپس میں جن سنگھ کے بانی شیاما پرساد مکھرجی کے نیم پلیٹ پر سیاہی پوتنے کا واقعہ سامنے آیا ہے۔

یونیورسٹی انتظامیہ نے پولس کو اس واقعہ کی اطلاع دی ۔انتظامیہ نے پولس کو اس معاملے کی جانچ کرنے کی ہدایت دی ہے اور اس کیلئے پانچ رکنی ٹیم تشکیل دی گئی ہے۔

پریڈنسی یونیورسٹی کی وائس چانسلر انورادھا لوہیا نے کہا کہ کل رات تک اس طرح کی کوئی خبر نہیں ہے ۔پریڈنسی یونیورسٹی جیسے ادارے میں اس طرح کا واقعہ رونما ہونا بہت ہی شرمناک ہے ۔قصور واروں کے خلاف سخت کارروائی کی جائے گی ۔

خیال رہے کہ تری پورہ میں بی جے پی کی جیت کے بعد بی جے پی حامیوں کے ذریعہ کمیونسٹ رہنما لینن کے مجسمہ کے انہدام کے بعد سے ہی ملک بھر میں مجسمہ کو نقصان پہنچانے کا سلسلہ شروع ہوگیا ہے ۔

اس سے قبل کولکاتہ میں شیاما پرساد مکھرجی کے مجسمہ کو نقصان پہنچایا گیا تھا اور گزشتہ ہفتہ بردوان ضلع کٹوا میں پنڈت جواہر لعل نہرو کی مورتی کو نقصان پہنچایا گیا تھا۔گرچہ وزیرا علیٰ ممتا بنرجی نے اس پورے معاملے میں سخت رویہ اپنانے کی بات کہی تھی مگر بنگال میں یہ واقعہ رکنے کا نام نہیں لے رہا ہے۔