وشیشور ہیگڑے کاگیری کرناٹک اسمبلی کے اسپیکر منتخب
اپوزیشن کانگریس اور جنتادل (ایس) نے اسپیکر عہدے کے لئے کسی امیدوار کا نام تجویز نہیں کیا تھا جس کی وجہ سے کاگیری کو اتفاق رائے سے اسپیکر منتخب کرلیا گیا۔
بنگلورو: بھارتیہ جنتا پارٹی (بی جے پی) کے سینئر لیڈر اور 6 بار کے رکن اسمبلی رہے وشیشور ہیگڑے کاگیری کو بدھ کو اتفاق رائے سے کرناٹک اسمبلی کا اسپیکر منتخب کرلیا گیا۔
وزیراعلی بی ایس یدی یورپا نے اسمبلی اسپیکر کے لئے وشیشور کاگیری کے نام کی تجویز دی اور بھارتیہ جنتا پارٹی کے رکن بسوراج بومئی نے اس کی حمایت کی۔ اپوزیشن کانگریس اور جنتادل (ایس) نے اس عہدے کے لئے کسی امیدوار کا نام تجویز نہیں کیا جس کی وجہ سے کاگیری کو اتفاق رائے سے اسپیکر منتخب کرلیا گیا۔
ڈپٹی اسپیکر کرشنا ریڈی نے وشیشور کاگیری کی امیدواری تجویز ایوان میں رکھی جو بغیر کسی مخالفت کے پاس ہوگئی۔ وشیشور کاگیری کو یدی یورپا اور اپوزیشن کے لیڈر اور کانگریس کے رکن سدارمیا انہیں اسپیکر کی کرسی تک لےگئے۔
یدی یورپا نے کہا کہ پارٹی کے سب سے سینئر ارکان اسمبلی میں سے ایک وشیشور کاگیری کے تجربے سے ایوان کو فائدہ ہوگا۔ سدارمیا نے بھی وشیشور کاگیری کے اسپیکر منتخب ہونے کا خیرمقدم کیا اور امید ظاہر کی کہ وہ منصفانہ طریقے سے ایوان کی کارروائی چلائیں گے۔
سابق اسمبلی اسپیکر کے آر رمیش کمار، بی جے پی لیڈر کے ایس ایشورپا، سابق وزیراعلی جگدیش شیٹار اور جے ڈی (ایس) کے رکن کے اور سابق وزیر اعلیٰ کماراسوامی سمیت کئی لیڈروں نے ایوان کی کارروائی بہترین انداز سے چلانے کے لئے ہرممکن تعاون دینے کا وعدہ کیا۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔