بی جے پی کارکنوں کو نڈا کی نصیحت، ایک بھی الیکشن نہیں  ہارنا

بھارتیہ جنتا پارٹی (بی جے پی) کے صدر جگت پرکاش نڈا نے پیر  یعنی گزشتہ روز پارٹی کارکنوں کو سال 2023 میں نو ریاستوں کے اسمبلی انتخابات اور اگلے سال لوک سبھا کے ہر انتخابات میں جیت کے لیے تیار رہنے کی تلقین کی اور وزیر اعظم نریندر مودی کی انتھک محنت کے سرمائے کا بھرپور فائدہ اٹھانے کے لئے کہا۔

کل دہلی میں شروع ہونے والی بی جے پی کی  دو روزہ قومی ایگزیکٹو میٹنگ میں جے پی  نڈا کے افتتاحی خطاب کی تفصیلات بتاتے ہوئے، پارٹی کے سینئر لیڈر روی شنکر پرساد نے صحافیوں کو بتایا، "صدر نے پارٹی کے لوگوں سے کہا ہے کہ سال 2023 بہت اہم ہے۔ اس سال نو ریاستوں میں اسمبلی انتخابات اور اگلے سال لوک سبھا کے انتخابات ہونے ہیں۔ ہمیں ایک بھی  الیکشن نہیں ہارنا ہے۔ جہاں حکومت ہے وہاں اسے مضبوط کرنا ہوگا اور جہاں حکومت نہیں ہے اسے مزید مضبوط کرنا ہوگا۔

روی شنکر  پرساد کے مطابق جے پی  نڈا نے کہا کہ وزیر اعظم نریندر  مودی کے خاکہ کے مطابق ہمیں 72 ہزار کمزور بوتھوں کو نشان زد کرکے مضبوط کرنے کا ہدف ملا تھا۔ ہر لوک سبھا حلقہ میں 100 بوتھ اور ہر اسمبلی حلقہ میں 25 بوتھس تک پہنچنا تھا، لیکن ہم کامیابی کے ساتھ ایک لاکھ 30 ہزار سے زیادہ بوتھ تک پہنچے۔