بی جے پی صدر جے پی نڈا اور وزیر دفاع راج ناتھ سنگھ کورونا سے متاثر

نئی دہلی: بھارتیہ جنتا پارٹی (بی جے پی) کے صدر جگت پرکاش نڈا اور وزیر دفاع راج ناتھ سنگھ کورونا سے متاثر ہو گئے ہیں۔دونوں نے خود ٹویٹ کر کے اپنے کورونا سے متاثر ہونے کی اطلاع فراہم کی۔

بی جے پی صدر جے پی نڈا نے ٹوئٹر پر لکھا کہ ابتدائی علامات کے پیش نظر انہوں نے اپنا کورونا ٹیسٹ کرایا اور رپورٹ مثبت آئی ہے۔ وہ خود کو بہتر محسوس کر رہے ہیں اور انہوں نے ڈاکٹروں کے مشورے پر خود کو آئسولیٹ کر لیا ہے۔ جے پی نڈا نے گزارش کی کہ پچھلے کچھ دنوں میں جو لوگ بھی ان کے رابطے میں آئے ہیں وہ اپنی جانچ کرا لیں۔

ادھر، کورونا سے متاثر راج ناتھ سنگھ نے بھی ٹویٹر پر خود کے کورونا سے متاثر ہونے کی اطلاع دی ہے۔ راج ناتھ سنگھ نے ٹویٹ کیا، ’’میرا کورونا ٹیسٹ پازیٹیو آیا ہے۔ ہلکی علامات ظاہر ہو رہی ہیں اور میں نے خود کو 'ہوم کوارنٹین' کر لیا ہے۔ حال ہی میں جو لوگ میرے رابطے میں آئے ہیں، میں ان سے گزارش کرتا ہوں کہ وہ آئسولیشن میں جائیں اور اپنا کورونا ٹیسٹ کرائیں۔‘‘

خیال رہے کہ سنگھ نے 6 جنوری کو اتراکھنڈ کے اترکاشی میں بھارتیہ جنتا پارٹی کی وجے سنکلپ ریلی کے اختتام کے موقع پر منعقدہ ایک ریلی سے خطاب کیا تھا۔ کورونا ہونے سے پہلے عوام کے ساتھ ان کا یہ آخری رابطہ تھا۔