ہم بھگوان رام نہیں کہ ساتھ کھانے سے دلت پاک ہو جائیں: اوما بھارتی

بی جے پی کی شعلہ بیان رہنما ڈر اور مرکزی وزیر اوما بھارتی نے دلتوں کے ساتھ کھانے سے یہ کہتے ہوئے انکار کر دیا کہ ’’ہم بھگوان رام نہیں ہیں کہ دلتوں کے ساتھ کھائیں اور وہ پاک ہو جائیں‘‘۔

تصویر سوشل میڈیا
تصویر سوشل میڈیا
user

قومی آوازبیورو

اتر پردیش میں دلتوں کے ساتھ کھانا کھانے اور وقت گزارنے سے متعلق بی جے پی نے جو سلسلہ شروع کیا ہے، وہ روزانہ کسی نہ کسی وجہ سے موضوعِ بحث بن رہا ہے۔ کبھی بی جے پی لیڈروں کے ذریعہ دلتوں کے گھر باہر سے کھانا منگا کر کھانے کی بات سامنے آ رہی ہے تو کبھی دلتوں کے گھر پہنچنے سے پہلے وہاں کی خوب صفائی کرنے کا معاملہ سننے کو مل رہا ہے۔ لیکن اوما بھارتی نے تو ایک تقریب کے دوران دلتوں کے ساتھ کھانے سے انکار کر کے سب کو حیران کر دیا۔ مرکزی وزیر اوما بھارتی نے سماجی برابری کے مدنظر منعقد ایک بھوج میں یہ کہتے ہوئے کھانے سے انکار کر دیا کہ ’’ہم بھگوان رام نہیں ہیں کہ دلتوں کے ساتھ کھانا کھائیں گے تو وہ پاک ہو جائیں گے۔‘‘ ان کے اس بیان سے صاف پتہ چلتا ہے کہ وہ دلتوں کو ناپاک تصور کرتی ہیں۔

ویسے تو بی جے پی لیڈروں نے دلتوں کو ہمیشہ خود سے الگ تھلگ ہی رکھا ہے لیکن گزشتہ کچھ مہینے سے دلتوں نے جس طرح بی جے پی حکمراں ریاستوں میں ان کے خلاف تحریک چلا رکھی ہے اس سے پریشان پارٹی صدر امت شاہ نے دلتوں کے گھر جا کر خود کھانا کھایا اور پارٹی لیڈروں کو ترغیب دی۔ اس کو دیکھتے ہوئے اتر پردیش کے وزیر اعلیٰ یوگی آدتیہ ناتھ نے تو ’راتری چوپال‘ میں دلتوں کے گھر شب گزاری کرنے اور کھانے کا بھی سلسلہ شروع کیا لیکن مختلف ذرائع سے خبریں آتی رہیں کہ وہ اور ان کے لیڈران دلتوں کے گھر کھانے کا صرف ڈرامہ کر رہے ہیں۔ کابینہ وزیر سریش رانا وغیرہ نے تو برسرعام باہر سے کھانا اور برتن منگوا کر دلتوں کے یہاں کھایا۔ اب جب کہ اوما بھارتی نے ایک اہم تقریب کے دوران واضح لفظوں میں دلتوں کے ساتھ کھانے سے انکار کر دیا ہے تو اُن کی سوچ کھل کر سامنے آ گئی ہے۔

معاملہ چھتر پور کے نوگاؤں واقع دَدری گاؤں کا ہے جہاں اوما بھارتی سنت روی داس کے مندر میں منعقد تقریب میں شامل ہونے کے لیے پہنچی تھیں۔ یہاں مذہبی تقریب کے ساتھ ساتھ سماجی برابری سے متعلق دعوتی تقریب بھی منعقد کی گئی تھی جہاں اوما بھارتی کو بھی کھانا تھا۔ اوما بھارتی کے ساتھ کھانے کے لیے کئی دلت بھی تقریب میں پہنچے تھے لیکن اوما بھارتی کے بیان سے وہ حیرت زدہ رہ گئے۔ اب اس تقریب کو منعقد کرنے والے اوما بھارتی کے ذریعہ دلتوں کے ساتھ نہ کھانے سے متعلق کچھ بھی بولنے سے انکار کر رہے ہیں۔

next