بی جے پی شورش پسندوں کی پارٹی، رام نومی کی ریلیوں میں تشدد بھڑکانے کی ذمہ دار: ابھشیک بنرجی

ترنمول کانگریس کے جنرل سکریٹری ابھشیک بنرجی نے ہفتہ کے روز بی جے پی کو ’شرپسندوں کی پارٹی‘ قرار دیا اور اس پر اسمبلی انتخاب سے قبل ریاست میں رام نومی ریلیوں کے دوران تشدد بھڑکانے کا الزام عائد کیا۔ ممتا بنرجی کے بعد ٹی ایم سی کے دوسرے نمبر کے لیڈر ابھشیک بنرجی نے بیربھوم ضلع کے لبھ پور میں ایک انتخابی ریلی سے خطاب کرتے ہوئے یہ بیان دیا۔ انھوں نے کہا کہ بنگال کے لوگ روایتی طور پر تمام تہواروں کو ہم آہنگی کے ساتھ مناتے آئے ہیں، لیکن بی جے پی ماحول کو بگاڑنا چاہتی ہے۔

ابھشیک بنرجی نے اپنی تقریر میں کہا کہ ’’کیا آپ نے درگا پوجا، کالی پوجا، جگدھاتری پوجا، عید، چھٹھ پوجا، کرسمس یا جین برادری کے جلوسوں کے دوران کسی شرپسندی یا جھڑپ کی کوئی خبر سنی ہے؟ پھر رام نومی جیسے مقدس موقع کا استعمال وہ (بی جے پی) تشدد اور افراتفری پھیلانے کے لیے کیوں کر رہے ہیں؟‘‘

دراصل انتخاب سے عین قبل مغربی بنگال کے مرشد آباد ضلع کے کچھ حصوں میں جمعہ کے روز اس وقت کشیدگی پھیل گئی جب رام نومی جلوس کے دوران جھڑپیں ہوئیں۔ کئی مقامات سے پتھراؤ، توڑ پھوڑ اور آگ زنی کی اطلاعات موصول ہوئیں۔ ایک سینئر پولیس افسر نے بتایا کہ رگھوناتھ گنج اور جنگی پور علاقوں میں دفعہ 144 نافذ کر دی گئی ہے۔ انہوں نے کہا کہ اب تک تشدد کے سلسلے میں 30 افراد کو گرفتار کیا جا چکا ہے۔

ڈائمنڈ ہاربر سے لوک سبھا رکن ابھشیک بنرجی نے اپنے خطاب میں کسی خاص واقعہ کا ذکر کیے بغیر الزام لگایا کہ بی جے پی کا مطلب ’شرپسند‘ ہونا ہے۔ انہوں نے دعویٰ کیا کہ بی جے پی اور اس کی حامی تنظیمیں رام نومی جلوسوں میں غنڈوں کو لاتی ہیں، جو تلواریں لہراتے ہیں اور برسر عام شراب نوشی کرتے ہیں۔ انھوں نے سوال اٹھایا کہ ’’صرف رام نومی کے دوران ہی تشدد کی خبریں کیوں آتی ہیں؟ بنگال میں تہواروں کے موقع پر بھائی چارے اور ہم آہنگی کی روایت ہے۔‘‘ انہوں نے یہ بھی کہا کہ ایودھیا کی عوام 2024 کے لوک سبھا انتخاب میں بی جے پی کو مسترد کر چکے ہیں، حالانکہ اس نے مذہب کی بنیاد پر سیاست کی تھی۔ انہوں نے یقین دلایا کہ بی جے پی کو بنگال اور دیگر انتخابی ریاستوں میں بھی یہی انجام دیکھنا پڑے گا۔

ابھیشیک بنرجی نے بی جے پی پر الزام لگایا کہ اس نے ریاست کے لوگوں کو ایس آئی آر کی قطاروں میں کھڑا ہونے پر مجبور کر کے اور لاکھوں حقیقی ووٹرس کے نام ہٹا کر مشکل میں ڈال دیا ہے۔ انہوں نے سوال کیا کہ بی جے پی لیڈر ایس آئی آر کے نام پر بنگال کے لوگوں کو دھمکیاں کیوں دے رہے ہیں؟ انہوں نے بیرونی زمینداروں کو عوام کو پریشان کرنے پر سبق سکھانے کی اپیل بھی کی۔

بنرجی نے دعویٰ کیا کہ قومی جمہوری اتحاد (این ڈی اے) نے اقتدار میں رہتے ہوئے آسام، بہار اور تریپورہ میں خواتین، نوجوانوں، بزرگوں اور سماج کے دیگر طبقات کے لیے ترقیاتی اقدامات شروع نہیں کیے، جبکہ ترنمول حکومت نے بنگال میں یہ کام انجام دیا۔ مرکز پر بنگال میں غریبوں کے لیے رہائشی اسکیموں کے لیے ایک پیسہ بھی منظور نہ کرنے کا الزام لگاتے ہوئے ابھشیک بنرجی نے کہا کہ ’’حالانکہ انہوں نے (مرکزی حکومت نے) ایک پیسہ بھی منظور نہیں کیا، لیکن ہم اگلے 6 ماہ میں ریاست کے ہر شخص کے سر پر چھت یقینی بنائیں گے۔‘‘

ریلی کے اختتام اور ابھشیک بنرجی کے اسٹیج سے اترنے کے فوراً بعد اسٹیج کے ایک حصہ میں آگ لگ گئی، تاہم اس حادثہ میں کوئی جانی نقصان نہیں ہوا۔ ایک افسر نے بتایا کہ جیسے ہی اسٹیج کو آگ نے اپنی لپیٹ میں لیا، موقع پر موجود فائر بریگیڈ کے عملہ نے فوری طور پر آگ پر قابو پا لیا۔ انہوں نے بتایا کہ آگ لگنے کی وجوہات کی جانچ کی جا رہی ہے۔