این آر سی اور شہریت قانون بنا کر بی جے پی اپنا ایجنڈا لاگو کر رہی ہے: پرشانت کشور

پارٹی لائن سے ہٹ کر پرشانت کشور نے ایک بار پھر یہ کہا ہے کہ بی جے پی این آر سی اور شہریت قانون کے ذریعہ اپنے ایجنڈے کو لاگو کر رہی ہے۔جنتا دل یونائٹڈ کے نائب صدر پرشانت کشور نے ایک ٹی وی چینل کو دیئے گئے اپنے انٹر ویو میں اس رائے کا اظہار کیا۔ انہوں نے اپنی پارٹی کے صدر اور بہار کے وزیر اعلی نتیش کمار کے تعلق سے کہا ہے کہ پارلیمنٹ میں شہریت بل کی حمایت کرنے سے ان کی شبیہ خراب ہوئی ہے یا اچھی ہوئی ہے اس کا کوئی سائنٹفک اعداد و شمار نہیں ہے۔ انہوں نے کہا کہ اگر نتیش کمار این آر سی پر یو ٹرن لیتے ہیں تو پھر اس وقت دیکھا جائے گا۔

پرشانت کشور نے کہا ہے کہ انہوں نے شہریت قانون پر کوئی بھی پارٹی مخالف کام نہیں کیا ہے بس اپنی رائے کا اظہار کیا ہے اور پارٹی کا جو اس پر موقف تھا بس اس کی روشنی میں انہوں نے اپنی رائے رکھی ہے۔ انہوں نے کہا کہ اس سارے معاملہ پر اپنے رہنما نتیش کمار سے ان کا تبادلہ خیال ہوا ہے۔این آر سی پر اپنی رائے کا ا ظہار کرتے ہوئے انہوں نے کہا کہ ان کی رائے میں این آر سی پر جو پارٹی کی رائے ہے ا س میں کوئی تبدیلی نہیں آئے گی اور پارٹی کی رائے ہے کہ بہار میں این آر سی کی کوئی ضرورت نہیں ہے۔

پرشانت کشور نے یہ بھی کہا کہ اس سارے معاملہ پر اب کوئی بحث کی ضرورت نہیں ہے کہ میں نے شہریت قانون پر کہا ہے کیونکہ میرا کہا ہوا سب کچھ پبلک ڈومین میں ہے اور میں اپنے موقف پر قائم ہوں۔ میں نے پہلے بھی کہا ہے کہ شہریت قانون اور این آر سی کا کمبی نیشن ملک کے مفاد میں نہیں ہے۔ انہوں نے کہا کہ نتیش کمار کو ان سے کوئی ناراضگی نہیں ہے، ہاں یہ ضرور ہے کہ ہمای پارٹی بڑی پارٹی ہے اور انہیں اپنے اندر کچھ اور سدھار کرنے کی ضرورت ہے۔